Барби ги преживеа речиси сите трендови. Прво ја менуваше бојата на косата, па бојата на кожата, потоа фризурите, а потоа и тежината, стилот и професиите. Од класична русокоса до безброј различни верзии, Барби секогаш се приспособуваше на времето и на трендовите.

Таа и овој пат го прави истото и заминува во иднината. Новата кукла добива роботски изглед и роботска мачка како домашно милениче. Осмислена е така што изгледа како ликовите од аниме цртаните филмови. Има „роботски“ костим, слушалки, долга руса коса и издолжено лице. Има и 13 зглобни точки, додека роботската мачка што доаѓа со барбиката има шест.

Компанијата „Мател Криејшнс“ ѝ ја довери новата верзија на најпознатата кукла на Јун Ан, корејско-американска дизајнерка и основачка на брендот „Амбуш“. Јун дипломирала графички дизајн на Универзитетот во Бостон во 2000 година, а на јавноста ѝ е позната и како директорка за дизајн на машки накит во компанијата „Диор“.


Јун истакна дека Барби за неа била важен дел од детството и прв начин да се внесе во различни улоги, да си игра со пријателите и преку неа да ги проживее сите фантазии и соништа што ги имала.

-Инспирација за мојата Барби беше идејата за тоа како Барби би изгледала во иднината, девојчињата да замислат како би можела да изгледа иднината и колку технологијата и сè што таа носи станува голем дел од нашиот свет. Навистина ми е голема чест. Сакам оваа Барби да ги инспирира девојчињата да размислуваат пошироко и да сонуваат поголеми соништа - истакна Јун.

Продажба на почетокот на септември

Куклата е дел од колекцијата „Барби сигначери“. Доаѓа во модерно пакување со сертификат за автентичност и тоа ќе биде ограничено, лимитирано издание на компанијата „Мател Криејшнс“.

На веб-страницата на компанијата започна одбројувањето до „лансирањето“ на куклата и според информациите од порталот, достапна е за купување од 4 септември.