Крајот на светот ќе се случи кога Сонцето ќе влезе во последната фаза од својот живот, што ќе има катастрофални последици, вели професорот Брајан Кокс.

Ѕвездата во центарот на нашиот Сончев Систем нема драматично да се промени повеќе од 4 милијарди години, но експертите веруваат дека моментално се наоѓа приближно на половина од својот животен век.

Во моментов, секоја секунда спојува околу 600 милиони тони водород во хелиум, претворајќи 4 милиони тони материја во енергија. Оваа сфера од вжештена плазма е најважниот извор на енергија за животот на Земјата, но експертите веруваат дека за околу пет милијарди години ќе му истече животниот век и дека драстично ќе го промени Сончевиот Систем.

Професорот Кокс открил како ќе изгледа крајот на нашата планета во документарецот на Би-би-си - „Чудата на вселената“.

Луѓето на Земјата ќе го доживеат последниот убав ден, а потоа ќе следува крајот

- Гледајќи во вселената, би можеле да помислите дека таа е постојано и непроменливо место и дека ѕвездите секогаш ќе бидат таму. Но, всушност, ѕвездите се само привремена појава на небото и, иако можат да сјаат милиони или милијарди години, можат да живеат само онолку долго колку што имаат резерви од водород.

Кога ѕвезда како нашето Сонце ќе остане без водород, почнува да умира, но крајот нема да биде мирен. На крајот од својот живот Сонцето нема едноставно да испари и да исчезне. Кога ќе почне да му снемува гориво, неговото јадро ќе се стеснува, а дополнителната топлина што ќе се создава притоа ќе доведе до ширење на неговите надворешни слоеви - објаснува професорот Кокс и додава дека Земјата ќе почне да ги чувствува последиците од промените на Сонцето многу порано.

- За околу една милијарда години тоа ќе има катастрофални последици врз нашиот кревок свет. Земјата постепено ќе станува сè потопла и потопла, вистински пекол. Ќе се случи еден последен совршен ден на Земјата, но потоа постоењето на каков било живот на Земјата ќе биде невозможно. Откако ќе исчезне човечкиот живот, Сонцето ќе порасне толку многу што ќе го исполни целиот хоризонт. Ќе стане црвен џин, што е последната фаза од неговиот живот - вели професорот.

Сонцето ќе продолжи да постои и по нас, но професорот Кокс објаснува дека нашата планета можеби нема да ја преживее таа фаза.

- Ако ја преживее, нема да остане ништо повеќе од изгорена и неплодна карпа што ќе сведочи за последните мигови на нашата ѕвезда. За 6 милијарди години нашето Сонце ќе експлодира, исфрлајќи огромни количества гас и прашина во вселената. Ќе биде само тоа, вжештена ѕвезда. Тоа е сè што ќе остане од нашето величествено Сонце.

Д-р Алан Стерн, водечки истражувач на мисијата „Нови хоризонти“ на НАСА, верува дека луѓето би можеле да најдат засолниште на Плутон и на други оддалечени џуџести планети во Кајперовиот Појас, подрачје зад Нептун исполнето со ледени вселенски карпи.

Како што Сонцето ќе се шири, условите на овие светови драстично ќе се променат и тие би можеле да станат она што д-р Стерн го опишува како светови што можат да се населат.

Денес џуџестите планети како Плутон содржат големи количества воден мраз и сложени органски материјали, а за некои од нив се смета дека имаат океани под својата површина.

Сепак, површинските температури на овие вселенски тела се стотици степени под нулата.

- Кога Сонцето ќе стане црвен џин, температурите на површината на Плутон ќе бидат приближно еднакви на просечните температури на површината на Земјата денес - вели д-р Стерн.

Извор: n1info.hr
Фото: Wikipedia