Естонија, Литванија и Латвија го формираа првиот „патувачки балон“ во Европа, дозволувајќи им на нивните граѓани неограничен премин помеѓу трите балтички држави.

- Тоа ќе ни помогне да ги зачуваме работните места, барем некои - изјави Зидре Гавелиене, од Одборот за туризам на Литванија.

Естонија веќе ја проценува својата подготвеност да го прошири балонот за повеќе земји кои се наоѓаат подалеку.

Шпанија е уште една земја која размислува за олеснување на ограничувањата, со предложените „зелени зони“ кои овозможуваат патување во области со ниски стапки на заразени.


- Она што го предлагаме е дека меѓународно, земјите треба да соработуваат за да овозможат патување во региони што се безбедни. На пример, шпанскиот остров Мајорка, каде вирусот е под контрола, може да се поврзе со, да речеме, Берлин, каде што вирусот исто така е под контрола - изјави Бери Праделски, од шпанскиот национален центар за истражување.

Во меѓувреме, Италија, една од најтешко погодените земји од Ковид-19, планира да ги отвори своите граници на меѓународните посетители на почетокот на јуни, а и ќе го укине 14-дневниот услов за карантин за луѓето што пристигнуваат во земјата.

Кафулињата, баровите и фризерниците повторно ќе се отворат наредната недела во обид да се врати економијата.

Премиерот на Италија, Џузепе Конте, рече дека ублажувањето на мерките е пресметан ризик и дека во сите области што ќе забележат значителни епидемии, ќе бидат вратени рестриктивните мерки.

Италија беше една од најтешко погодените земји со Ковид-19, со повеќе од 225.000 потврдени случаи и над 32.000 смртни случаи. Повеќе од 127.000 луѓе оздравеле.

Извор: Тvnz.co.nz