Германската влада усвои акциски план со кој сака на граѓаните да им овозможи полесен пристап до становите со умерена кирија, а германската канцеларка Ангела Меркел рече дека изнајмувањето по пристапни цени е една од најважните цели на нејзината влада.
-Ние сакаме да вложиме големи напори за да ја постигнеме нашата цел, а тоа е повеќе станови на германскиот пазар на недвижнини. Тоа е едно од најважните социјални прашања - рече германската канцеларка по средба со економисти и политичари.
Таа најави и изградба на дополнителни 100.000 социјални станови во Германија. Министерот за финансии, Олаф Шолц, најави и полесно финансирање на изградбата на социјалните станови преку средства од сојузниот буџет.
-Она што ни е потребно во Германија е повеќе станови кои може и да се платат. Киријата од десет евра по квадрат (без режимски трошоци) ги доведува граѓаните на работ на финансиската издржливост - истакна Шолц.
Министерот за внатрешни работи Хорст Зехофер, пак, истакна дека пораката од состанокот е: поголема понуда, пониски цени.
Кириите во Германија, особено во поголемите градови, во текот на последните години се зголемуваа со голема брзина, а во градовите како Минхен и Хамбург, киријата од 15 евра по метар квадратен веќе не е реткост.
Новиот план предвидува и
таканаречена кочница на растот на кириите, која оневозможува драстично зголемување на станарината при промена на станари, како и отежнато зголемување на станарината при реновирање.