Германската амбасада во Скопје објави соопштение во кое детално се објаснува како ќе се одвива лотаријата за доделување термини за поднесување барања за визи.

Оттаму посочуваат дека за доделување термини за виза сега ќе се спроведува лотарија еднаш месечно. Така, на почетокот на секој месец, ќе се отвори нова листа за регистрација на термини за поднесување барање за визи. Оваа листа ќе биде отворена за регистрации за одреден временски период (најверојатно 2 недели). Листата нема да се затвори, како досега, кога ќе се дојде до одредена бројка на регистрации, туку ќе се затвори на одреден ден и од сите регистрации, компјутерски, по случаен избор по пат на лотарија ќе се избере кој ќе добие термин за следниот месец. За точните податоци кога ќе се отвори листата, од Амбасадата истакнаа дека ќе информираат навреме на нивната страница фејсбук-профилот.

Лотаријата ќе се спроведе во германското Министерство за надворешни работи во Берлин под надзор од повеќе лица. Веднаш потоа избраните лица ќе бидат известени од Амбасадата кога ќе биде нивниот термин во следниот месец, појаснуваат од Амбасадата и додаваат дека сите регистрации ќе учествуваат во постапката за лотарија, независно од тоа кога била регистрацијата. Регистрацијата што била порано направена нема никаква предност наспроти регистрацијата што била подоцна направена, се нагласува во соопштението.

- Исклучена е можноста за повеќе регистрации. Не постои можност ниту за дополнителна промена на податоците што се внесени при регистрацијата. Не е дозволено отстапување на терминот на друго лице. Нема потреба од учество на трети лица (на пр., некоја агенција) и со тоа не се добива никаква предност. Ве молиме регистрирајте се самите за постапката и задолжително внимавајте на точноста на вашите податоци. И покрај тоа што имате потврден термин, влез во визниот оддел ќе биде дозволен само ако личните податоци во пасошот на подносителот на барањето целосно се совпаѓаат со податоците што се внесени во терминот за регистрација - објаснуваат од амбасадата.