Зголемениот ризик за појава на аутизам се чини дека е поврзан со хромозомот Y, покажала студијата на здравствениот систем „Гајсингер“, која нуди ново објаснување за поголемата преваленца на аутизмот кај мажите.
Нарушувањето од спектарот на аутизмот е невро-развојна состојба, која се карактеризира со нарушена социјална интеракција и комуникација, како и ограничени и повторувачки модели на однесување, интереси и активности. Аутизмот е речиси четирипати поприсутен кај мажите отколку кај жените, но причината за оваа разлика не е добро утврдена.
Една вообичаена хипотеза ја вклучува разликата во половите хромозоми помеѓу мажите и женките - типичните жени имаат два Х хромозоми, додека типичните мажи имаат еден Х и еден Y хромозом.
-Водечка теорија во оваа област е дека заштитните фактори на Х-хромозомот го намалуваат ризикот од аутизам кај жените – истакнал д-р Метју Отјенс, доцент на Институтот за аутизам и развојна медицина при „Гајсингер“.
Истражувачкиот тим од здравствениот центар, предводен од д-р Оетјенс и д-р Александар Бери, се обидел да ги утврди ефектите на хромозомите X и Y врз ризикот од појава на аутизам, преку испитување на дијагнозите за состојбата кај луѓе со абнормален број на X или Y хромозоми, генетска состојба позната како анеуплоидија на полови хромозоми.
Тимот анализирал податоци за генетски дијагнози, како и дијагнози за аутизам на 177.416 пациенти. Тие откриле дека индивидуите со дополнителен хромозом X немаат промена во ризикот за појава на нарушувањето, но дека оние со дополнителен хромозом Y имале двојно поголема веројатност да имаат дијагноза на аутизам. Ова укажува на фактор на ризик поврзан со хромозомот Y.
-Нашите резултати нè охрабруваат да бараме фактори на ризик за аутизам кај хромозомот Y, наместо да го ограничиме нашето пребарување на заштитни фактори на хромозомот Х. Сепак, потребни се дополнителни истражувања за да се идентификува специфичниот фактор на ризик поврзан со хромозомот T – рекол д-р Бери.
Оваа анализа, исто така, ја потврдува претходната работа со тоа што покажува дека губењето на X или Y хромозомот, познат како Тарнеров синдром, е поврзано со големо зголемување на ризикот за појава на аутизам. Потребни се дополнителни истражувања, за да се утврди дали факторите на ризик за појава на аутизам поврзани со анеуплоидијата, ја објаснуваат половата разлика во преваленцата на аутизмот.
Студијата е објавена во „Нејчр комјуникејшнс“.
Извор: medicalxpress.com
Фото: Freepik