Финската премиерка Сана Марин се залага за скратување на осмучасовниот работен ден, изјавувајќи дека пократкото работно време може да се надомести со зголемување на продуктивноста.

Сана Марин, која ја започна идејата за шестчасовен работен ден пред да стане премиерка, ќе мора да ги убеди другите четири партии во коалициската влада да го отворат патот за скратување на работниот ден заради зголемената невработеност предизвикана од пандемијата.

- Треба да создадеме јасна визија и конкретни чекори за Финска да се движи кон пократко работно време, а вработените во Финска кон подобар работен живот - им рече 34-годишната лидерка на членовите на партијата, кои неодамна ја избраа за претседател на социјалдемократите.

Сана Марин, еден од најмладите премиери во светот, ја предводи финската централнолевичарска влада од декември 2019 година, откако еден од сојузниците во коалицијата го натерал нејзиниот претходник, Анти Рине, да поднесе оставка.

Заедно со Рине, кој до неделата беше на чело на партијата, Сана Марин ја насочи владата кон левичарски идеали.

Нејзината партија во дебата го отфрли предлогот за експериментирање со шестчасовниот работен ден, усвојувајќи го предлогот за поголема флексибилност во работниот живот.

Сана Марин рече дека пократкото работно време е можно со зголемена продуктивност и нема да биде во спротивност со силните јавни финансии или целта на владата да ја зголеми стапката на вработеност од сегашните 73,7 отсто на најмалку 75 отсто.

- Богатството што го носи зголемувањето на продуктивноста на работата мора да се дели не само меѓу сопствениците и инвеститорите, туку и со обичните работници - рече таа и додаде дека владата планира да инвестира во образованието и има цел да ја направи Финска јаглерод-неутрална до 2035 година, повикувајќи на зелени инвестиции за зајакнување на економијата.