По над 73 години задоцнување, една книга е вратена во библиотека во Фајф.

„Величествено дрво“ од Руперт Хјуз, авантуристичка приказна сместена во Бостон, требало да биде вратена во централната библиотека „Данфермлајн Карнеги“ на 6 ноември 1948 година.

Сепак, вработените во библиотеката биле зачудени кога добиле пакет со книгата минатата недела. Книгата била најдена од ќерката на тој што ја позајмил, па била испратена во библиотеката.

- Се насмеав кога ја отворив пратката, не можев да поверувам. Неодамна, по 14 години ни беше вратена книга во една од нашите филијали, за што мислевме дека е неверојатно, но ова беше многу повеќе од она што сме слушнале - вели Дона Девар, вработена во библиотеката.


Библиотеката им ги прости долговите на позајмувачите во текот на пандемијата за да ги охрабри членовите да ги вратат книгите.

Во писмото, ќерката на позајмувачот објаснува дека нејзиниот покоен татко живеел во Торнтон во Фајф во 1948 година. Таа напишала дека никогаш нема да дознае дали тој едноставно заборавил да ја врати книгата или избрал да ја задржи.

- Сметам дека е фасцинантно да се видат датумите кога била земена книгата, во последните години од Втората светска војна - пишува неговата ќерка.

Гинисовиот рекорд за најзадоцнета книга во библиотека и понатаму го држи една книга вратена на колеџот „Сидни Сасекс“ при Универзитетот „Кембриџ“. Книгата била позајмена во 1668 година, а вратена 288 години подоцна.

Извор: ВВС
Фото: PA Media