Глобалните приходи на забавниот и медиумскиот сектор се зголемија за 5 отсто во 2023 година, на 2,5 билиони евра, што е повеќе од вкупниот раст на светската економија, а се предвидува дека глобалните приходи на секторот ќе достигнат 3,1 билиони евра до 2028 година, со годишна стапка на раст од 3,9 отсто.

Ова се резултатите од истражувањето на „PwC“ (мултинационален бренд на фирми за професионални услуги), спроведено во 13 сектори во 53 земји.

Краткорочно, се очекува дека приходите од реклами ќе ја надминат границата од билиони долари во 2026 година и дека тие ќе сочинуваат повеќе од половина или 55 проценти од вкупниот раст на приходите во секторот за забава и медиуми во следните пет години. На глобално ниво, САД остануваат најголемиот пазар за трошење и рекламирање со проектирана сложена годишна стапка на раст од 4,3 проценти до 2028 година.

САД се одговорни за повеќе од една третина од глобалната потрошувачка во 2023 година. Со стапката на раст во овој сектор водат Нигерија (10,1 отсто) и Индонезија (8,5 отсто), двете земји со повеќе од 200 милиони жители, а потоа се Индија (8,3 отсто) и Кина (7,1 %).

Вернер Балхаус, шеф на услуги во секторот за забава и медиуми од „PwC“ Германија, истакнува дека континуираниот раст носи ризици, но и можности.

- Промените во преференциите на потрошувачите, заедно со несигурноста во врска со континуираното влијание на дигиталната трансформација и новите технологии, како што е генеративната вештачка интелигенција, предизвикуваат бран на трансформации во деловните модели. За да го обезбедат својот дел од растечките текови на приходи што ги идентификувавме, играчите на пазарот мора повторно да размислат како нивните компании создаваат, испорачуваат и задржуваат вредност. Ова подразбира искористување на растот на рекламирањето и истовремено искористување на силниот потенцијал на вештачката интелигенција. Со оглед на зголемената потрошувачка на виртуелна содржина од страна на потрошувачите, компаниите ќе треба да ја прошират својата понуда на производи и да продолжат да комуницираат со потрошувачите на платформите каде што го поминуваат поголемиот дел од своето време.

Се предвидува дека глобалните приходи од реклами ќе пораснат до 6,7 отсто до 2028 година, кога приходите во овој сектор ќе се удвојат во споредба со 2020 година. Во исто време, најголемата и една од најбрзорастечките компоненти на рекламниот сектор е онлајн рекламирањето, кое пораснало за 10,1 отсто во 2023 година, генерирајќи 44,2 милијарди евра нови приходи. Се очекува да продолжи да расте со годишна стапка од 9,5 отсто до 2028 година, кога ќе учествува со 77,1 отсто од вкупната потрошувачка на реклами.

Истражувањето открива дека користењето стриминг-услуги продолжило да расте, но не со иста брзина како во претходните години. Имено, давателите на овие услуги се соочуваат и со предизвиците како да ги убедат потрошувачите да платат повеќе за дигитални добра и услуги.

Глобалните претплати на OTT видеоуслуги (медиуми, комуникација и информации и други услуги директно понудени и достапни за гледачите преку отворениот интернет) во 2028 година ќе пораснат до 1,9 милијарди.

Нови модели на раст

Ефектот на стагнација веќе ги принуди стриминг-сервисите да ги преобликуваат своите бизнис-модели, како и да бараат нови извори на приход надвор од претплатите, што вклучува воведување поевтини опции за претплата кои содржат реклами. Има и мерки, како што се консолидација на секторот и сузбивање на споделувањето лозинки, како и воведување спортски преноси.

Висока позиција меѓу најбрзорастечките сегменти на секторот за забава и медиуми имаат и игрите со е-спортот. Приходите од индустријата за игри пораснале за 4,6 отсто, на 209 милијарди евра во 2023 година и се очекува да надминат 275 милијарди евра до 2027 година, што е речиси двојно повеќе од нивото во 2019 година.

Така, индустријата за игри се движи во обратнопропорционална насока во однос на автомобилската индустрија, која во 2019 година беше пазар вреден речиси 400 милијарди евра на европско ниво, а се очекува да падне на 298 милијарди евра до 2035 година.

Регионално, најголемиот пазар за игри и понатаму е азиско-пацифичкиот пазар, кој учествува со 48,1 отсто од вкупниот глобален сегмент, а до 2028 година се предвидува дека ќе има уште поголем удел (54,4%).

Во другите сегменти на забавниот и медиумскиот сектор, значителен раст продолжува да се постигнува со музика во живо и кино - приходите од концерти во живо се зголемиле за 26% и сочинуваат повеќе од половина од вкупниот музички пазар, додека поттикнато од неколку блокбастери во 2023 година, киното забележало раст на приходите од 30,4 отсто во споредба со 2022 година, а до 2026 година се очекува глобалните приходи да ги надминат бројките од пред пандемијата.

Извор: n1info.hr

Фото: Freepik