Британскиот аристократ сер Бенџамин Слејд повторно се најде во центарот на вниманието откако објави необична листа со услови што мора да ги исполни неговата идна сопруга.

Слејд бара значително помлада жена и, како што самиот вели, сака таа да му роди машки наследник кој еден ден би го презел неговиот имот.

Тој објавил подолг список со критериуми што ги очекува од својата идна сопруга.

Слејд е роден во 1945 година и потекнува од семејство кое со векови живее во областа Нетер Стоуи. Бил во брак со благородничката Полин Керол Мајбург, а се развеле во 1989 година по 12 години заеднички живот. Тој тврди дека нивниот брак пропаднал затоа што неговата поранешна сопруга имала 17 мачки.

Подоцна бил во врска со неколку жени, а една партнерка, Бриџит Конвеј, ја оставил во 2017 година кога таа имала 50 години бидејќи, според него, не можела да има деца.

Листа со барања

По раскинувањето во 2017 година, Слејд почнал да составува листа со услови за потенцијалните кандидатки. Тврди дека партнерката мора да биде најмалку 20 години помлада од него поради данокот на наследство и начинот на кој би се пренесувал имотот.

- Данокот на наследство е 40 отсто. Единствениот начин имотот и уметничките дела да ги пренесам без данок е прво сè да ѝ оставам на сопругата, а потоа таа подоцна да го распределува понатаму - вели тој.

Условите се долги и прилично необични. Идната сопруга не смее да биде скорпија во хороскоп, мора да има возачка дозвола, а пожелно е да има дозвола за управување со хеликоптер. Не смее да користи дрога, ниту да консумира алкохол. Идеално би било да потекнува од угледно семејство и да има сопствен грб. Навел и низа исклучувања: жената не смее да доаѓа од земји чие име почнува на буквата „И“ или имаат зелена боја на знамето, со исклучок на Италија и Северна Индија. Исклучил Шкотланѓанки, лезбијки и комунистки.

Од идната сопруга очекува и добро да танцува стандардни танци и да знае да ракува со сачмарка. Не смее да го чита весникот „Гардијан“, не смее да биде повисока од 165 сантиметри, но мора да биде во добра форма и да сака прошетки и пливање. Како предност ги навел бриџот, бекгемонот и решавањето крстозбори.

Што нуди за возврат?

Свесен дека критериумите му се строги, Слејд вели дека на жената што ќе ги исполни условите би ѝ плаќал околу 58.000 евра годишно за управување со неговиот имот во Самерсет, кој се простира на 1.300 хектари. Дополнително споменува бонуси, автомобил, куќа, покриени трошоци, храна и одмори.

Интересно е што Слејд веќе има дете, односно ќерката Вајлет, која ја добил со американската поетеса Сахара Сандеј Спејн. Иако признал дека постои, вели дека никогаш не ја запознал. И покрај тоа, и натаму инсистира на машки наследник, објаснувајќи дека сака потомок кој ќе ја продолжи традицијата и ќе се грижи за имотот.

Извор: Nezavisne.com
Фото: Sir Benjamin Slade/Facebook