Нешто повеќе од половина, или поточно 54,9 проценти од 1.046 анкетирани читатели се за воведување задолжителна вакцинација против ковид-19. Ова се резултатите од анкетата што анонимно и онлајн ја споведе Факултети.мк под прашањето „Дали сте за задолжителна вакцинација против ковид-19?“
Поголемиот дел од испитаниците биле машки, и тоа 55,7 проценти, наспроти 44,5 женски. Инаку, најголем дел од испитаниците се од Скопје, а возраста на тие што одговориле најчесто се движи помеѓу 30 и 50 години, но има и доста помлади и постари што одговориле.
На испитаниците им беше дадена можност да образложат зошто кликнале „да“ или „не“, а еве дел од одговорите.
- Само на тој начин може да се сопре вирусот.
- Да се имунизира цела популација за да го победиме вирусот.
- Заради заштита од нов бран.
- Намалување на број на заразени, олеснување на мерки, колективен имунитет, нормално е да се вакцинираш.
- Тоа е единствениот начин да се справиме со коронавирусот, а и во случај на зараза да помине со благи симптоми.
- За полесно да се врати општеството во нормала, уште едно затворање и ќе треба да прогласиме стечај на државата.
- Здравјето е индивидуална работа и во никој случај не зависи од друг. Секој сам си одговара за своето здравје и никој нема право насилно да влијае врз друга индивидуа во врска со здравјето.
- Не е доволно испитана, мој живот, моја одлука, најголем експеримент врз човештвото.
- Секоj човек има право и избор на лек или лекување, сè друго е насилство.
- Бидејќи не се доволно долго тестирани, нема статистика за нуспојави и крајно не се ефикасни против новите мутации.
- Се коси со основните човекови права.
- Мое тело, мој избор.