Откако ќе бидат сведоци на трагични настани, луѓето сѐ почесто се обраќаат до онлајн заедниците за совет и помош. Еден од советите што можеме да ги најдеме таму е играњето „Тетрис“ бидејќи тоа им помага да се борат против трауматичните спомени.

Од каде потекнува оваа идеја и дали оваа култна игра навистина може да помогне во лекувањето  состојби како посттрауматско стресно растројство? Одговорот е да, но тоа зависи од неколку фактори, како што се специфични симптоми, времето на случениот настан што довел до состојбата и други видови психолошки третмани.

Како може да помогне „Тетрисот“?

Од своето појавување во 1985 година, „Тетрис“ беше и останува една од најпопуларните игри во историјата, достапна бесплатно онлајн и на многу платформи за игри, најмногу поради едноставноста на форматот на сложувалката. И бидејќи човечкиот мозок има ограничена способност да обработува или да се сеќава на спомените од настаните, истражувачите од Универзитетот „Оксфорд“ уште во 2009 година предложиле дека играњето „Тетрис“, додека мозокот се обидува да складира визуелни спомени, ќе го преоптовари неговиот капацитет и ќе ги „наруши“ врските за визуелна меморија.

Играњето „Тетрис“ кратко време по вознемирувачки настан може да ги прекине овие центри за обработка во мозокот. За возврат, ова би го намалило повторувањето на несаканите визуелни спомени поврзани со траумата. Покрај тоа, „Тетрисот“ може да помогне и кога сеќавањата на траумата се реактивираат за време на третманот со психолог. Во суштина, според истражувачите, „Тетрисот“ дејствува како „когнитивна вакцина“ против наметливите визуелни сеќавања од траумата.

Придобивката од играњето

Истражувањето за ефектите на „Тетрисот“ врз состојбата сè уште е во рана фаза. Првичната студија од 2009 година забележува три пати поголем број несакани визуелни спомени кај луѓето кои не играле „Тетрис“. Подоцна биле спроведени неколку клинички студии и сите покажале дека играњето „Тетрис“ го намалува бројот на „упади“ кај мајките што го доживеале породувањето како трауматично искуство, луѓето што учествувале во сообраќајни несреќи, воените бегалци и воените ветерани.

Иако повеќето студии вклучуваат учесници кои играле „Тетрис“ кратко време по трауматски настан, неодамнешно истражување сугерира дека може да има придобивки од играњето „Тетрис“ дури и седум години по траумата поврзана со породувањето.

Според експертите, „Тетрисот“ не е лек за траума и наметливите сеќавања не можат целосно да се искоренат со играње игри. Во тој случај најдобро е да се побара стручна помош.

Извор: bug.hr

Фото: Pexels