Не постои ништо слично на чувството кога ќе дознаеш дека плановите се откажани во последен момент. Едно истражување објавено во „Журнал оф асосиејшн фор консумер рисрч“ заклучува дека постои интересна причина зошто се чувствуваме речиси еуфорично кога се случува тоа.
Можеби звучи чудно што се чувствуваме толку среќни кога плановите се откажуваат во последен момент, бидејќи сите имаме натрупани распореди и тоа може да биде голема непријатност. Но, сепак, чувствуваме олеснување кога дознаваме дека состанокот или дружењето нема да се одржи, а сето тоа има врска со начинот на кој го перципираме времето што го имаме.
Луѓето сакаат плановите да им бидат откажани затоа што „добиеното време“ се чувствува подолго
„Добиено време“ се дефинира како „слободно време што доаѓа неочекувано“. Ова време се чувствува подолго од слободното време за кое однапред знаеме дека го имаме, иако реално трае исто.
Истражувачите спровеле неколку експерименти за да го докажат ова. Во еден од нив група студенти биле во лабораторија на предавање и им било кажано дека ќе завршат 10 минути порано. Во меѓувреме, на друга група им било кажано дека сесијата ќе трае 30 минути, но завршила по 20 минути.
И двете групи имале исто време на располагање, но групата што не очекувала слободно време се движела порелаксирано кон следните активности, бидејќи ѝ се чинело дека има повеќе време.
Овој ефект се нарекува „контрастен ефект“
Американската психолошка асоцијација го дефинира контрасниот ефект како „перцепција на засилена или зголемена разлика помеѓу два стимули или сензации кога тие се споредуваат или кога едниот следува веднаш по другиот“.
Ова значи дека нашата процена за нешто зависи од тоа со што го споредуваме. Во случајот со „добиеното време“, тоа се споредува со очекувањето дека нема да имаме слободно време, па затоа ни изгледа подолго отколку што навистина е.
Интересно е што ова чувство не се менува без разлика дали навистина сме сакале плановите да се откажат или не. Откажан стоматолошки преглед веројатно ќе предизвика поголемо олеснување отколку откажана вечер со пријатели, но перцепцијата за времето останува иста.
Мајкл Видерман, професор по клиничка психологија, објаснува дека времето е чудна работа бидејќи сите сакаме да добиеме повеќе од него. Но технички, секој има 24 часа во денот, и тие часови ги троши различно.
Ова претставува предизвик за тоа како може да се примени истражувањето во реалниот живот. Експериментот со студентите покажал дека тие не само што се чувствувале како да имаат повеќе време, туку и навистина се однесувале порелаксирано. Откажаните планови во последен момент можат да бидат позитивни во овој контекст бидејќи нè тераат да забавиме во секојдневното брзање.
Секако, не е практично да се планира секоја минута од денот со надеж дека ќе се откаже.
За подобро да се искористи времето, професорот Видерман предлага едноставно да го управуваме сопственото однесување за ефикасно да ги задоволиме нашите потреби.
Извор:
Yourtango.com
Фото: Freepik