Планираната аукција на повеќе од 100 предмети пронајдени во остатоците од британскиот прекуокеански брод „Титаник“ се соочува со противење од американската влада, покажуваат неодамна објавени судски документи.

Компанијата „РМС Титаник инк.“, која има ексклузивни права за истражување и вадење предмети од остатоците на бродот што потонал во северниот дел на Атлантскиот Океан во 1912 година, сака да продаде дел од својата колекција. Таа вклучува лични предмети на патници, пари, кујнска опрема и украсни артефакти.

Меѓу предметите што би можеле да се најдат на аукцијата се бронзена фигура на ангел, ѓердан со златни топчиња и приврзок во форма на срце.

Компанијата планира и меѓународна изложба во четири града, но засега не се објавени локациите.

Американските власти се против продажбата

Против продажбата се изјасни Националната управа за океани и атмосфера, која ги застапува интересите на САД во врска со заштитата на локалитетот на потонатиот брод во северниот Атлантик.

Од институцијата сметаат дека аукцијата би претставувала прекршување на претходните судски договори, според кои предметите треба да се чуваат како единствена колекција и да бидат достапни за јавноста преку музејски поставки.

Американската влада наведува дека компанијата не бара одобрение од судот, не смета дека такво одобрение е потребно и тврди дека не е ограничена во можноста да ги продава предметите.

Од друга страна, „РМС Титаник инк.“ претходно соопшти дека планираната продажба не ги прекршува постојните судски одлуки и договори.

Од 1987 година, за време на експедициите до потонатиот брод, биле извадени неколку илјади предмети, вклучувајќи и делови од трупот на бродот.

Компанијата досега главно ги финансирала своите активности преку изложби, додека обидите за продажба редовно наидувале на противење од судови, организации за заштита на културното наследство и семејства на жртвите.

Интересот за предмети поврзани со „Титаник“ останува исклучително голем.

Минатата година златен џебен часовник од 18 карати, кој му припаѓал на американскиот бизнисмен Исидор Штраус и бил подарок од неговата сопруга Ајда Штраус за неговиот 43. роденден, бил продаден за повеќе од два милиони долари.

Во 2013 година виолина за која се верува дека свирела при потонувањето на бродот достигнала цена од 1,45 милиони долари.

Во април годинава елек за спасување што го носел патник од „Титаник“ бил продаден на аукција за 906.000 долари, додека перница за седење од еден од спасувачките чамци била продадена за 527.000 долари.

Една од најголемите поморски трагедии

„Титаник“ потонал на 15 април 1912 година откако удрил во санта мраз за време на првото патување од Саутемптон во Англија до Њујорк во САД.

Во катастрофата загинале повеќе од 1.500 луѓе.

Професорот по право Ричард Дејнард од Правниот факултет на Универзитетот Нортистерн во Бостон изјави дека правилата за изложување и продажба на артефакти од „Титаник“ се наменети за зачувување на потонатиот брод во интерес на јавноста.

- Тие не треба да завршат во рацете на милијардери само за да бидат уште еден симбол на нивното богатство и моќ - истакна тој.

Извор: Nezavisne.com
Фото: Screenshot/YouTube