Многумина од генерацијата З и милениумците не поседуваат ЦД-плеери - дисковите се купуваат како колекционерски предмети, а слушањето дури потоа доаѓа на ред: побарувачката за читачи, нови и користени, дури сега почнува да расте.

„Луминејт“, американска компанија за аналитика на музички и забавни податоци, во својот полугодишен извештај за 2026 година објави податок што открива поинаква страна на враќањето на физичките носачи на звук: продажбата на компакт-дискови во првата половина од годината растела речиси седумпати побрзо од винилот, со пораст од 16 %, на 16,3 милиони примероци.

Побрзиот раст не значи и поголем пазар

„Луминејт“ не го наведува апсолутниот број на продадени винилни плочи, па споредбата останува на ниво на стапки на раст, а не на обем. Винилот и понатаму продава значително повеќе примероци и носи повеќекратно поголем приход, а податокот за речиси седумкратно побрзиот раст се однесува на динамиката, а не на апсолутните количества.

Причината за овој раст е помалку поврзана со слушањето музика отколку што се очекува. Според наодите на „Луминејт“, приближно половина од купувачите од генерацијата З и милениумците што купуваат цедеа не поседуваат уред за слушање. Купувањето диск за оваа група купувачи е директна поддршка за изведувачот денес, кога исплатите од стриминг  остануваат ниски, но и колекционерски предмет наменет за изложување на полица, а не за пуштање. Со тоа физичкиот примерок станува опиплив доказ за припадност кон одреден албум и период, без оглед на тоа дали некогаш ќе заврши во цеде-читач.

Албумите како обемни интерактивни артефакти

Значителен дел од продажбата доаѓа од источноазиската музичка индустрија. К-поп албумите се осмислени како обемни интерактивни артефакти со по случаен избор распоредени фотокартички, постери и налепници, со што самиот диск се претвора во колекционерски објект. Големите изданија, како албумот „Ариранг“ на групата „БТС“ (BTS), во првата половина од годината се продадоа во неколку стотици илјади примероци.

Трендот, сепак, не се сведува само на тој жанр. Податоците на „Луминејт“ покажуваат дека дури и кога К-попот целосно ќе се изземе од пресметката, продажбата на цедеа во Соединетите Држави пораснала за 6,7 % на годишно ниво, што е речиси трипати повеќе од растот на винилот (2,4 %).

Проблеми со производството на винил-плочите