Истражувачите од Универзитетот „Астон“ постигнале брзина на пренос на податоци на интернет која е неверојатни 4,5 милиони пати поголема од просечниот домашен широкопојасен интернет. Таа е најбрзата досега забележана, а ја постигнале со користење специфични појаси со нови бранови должини, кои претходно не биле користени во системите со оптички влакна.

Како дел од меѓународната соработка, тимот пренесувал податоци со брзина од 301 терабит во секунда или 301.000.000 мегабити во секунда, користејќи едно, стандардно оптичко влакно. За перспектива, извештајот за перформансите на домашен широкопојасен интернет на „Офком“ во Велика Британија, објавен во септември 2023 година, наведува дека просечната брзина на широкопојасен интернет е само 69,4 мегабити во секунда.

Успешното пренесување на податоците било резултат на заедничките напори на професорот Владек Форисијак од Институтот за фотонски технологии при „Астон“ и д-р Иан Филипс. Тие работеле заедно со истражувачи од Националниот институт за информатичка и комуникациска технологија во Јапонија и „Нокиа Бел Лабс“ во САД.

Како што се зголемува побарувачката за повеќе податоци, се очекува оваа новоразвиена технологија да помогне да се остане во чекор со идната побарувачка. Научниците користеле оптички влакна, мали тубуларни нишки од стакло кои пренесуваат информации користејќи светлина, медиум со кој обичните бакарни кабли не можат да се совпаднат во однос на брзината.

Тимот го постигнал овој подвиг со отворање нови појаси на бранови должини, кои сè уште не се користат во нормалните системи со оптички влакна за интернет. Различните појаси на бранови должини се еквивалентни на различни бои на светлина што се пренесуваат низ оптичкото влакно. Тие го постигнале ова со развивање нови уреди наречени оптички засилувачи и еквилајзери за оптичко засилување.

Д-р Филипс го предводел развојот на уредот за управување, или оптичкиот процесор, на Универзитетот „Астон“.

- Во текот на последните неколку години Универзитетот „Астон“ развива оптички засилувачи кои работат во Е-појасот, кој се наоѓа во непосредна близина на Си-појасот во електромагнетниот спектар, но е околу три пати поширок - вели Филипс.

Професорот Форисијак додава: „Со зголемување на капацитетот за пренос во основната мрежа, нашиот експеримент може да доведе до значително подобрени врски за крајните корисници. Ова револуционерно достигнување ја нагласува клучната улога на унапредувањето на технологијата на оптички влакна, во револуција во комуникациските мрежи за побрз и посигурен пренос на податоци.

Ова достигнување не само што претставува значителен скок напред во технологијата за пренос на податоци, туку поставува и нов репер за идните истражувања во оваа област.

Успешниот пренос на податоци со толку големи брзини од страна на тимот на Универзитетот „Астон“ е доказ за потенцијалот на технологијата на оптички влакна.

Извор: Interesting Engineering

Фото: Freepik