Мексиканската полиција и државното обвинителство на Халиско официјално потврдија дека водат итна истрага против анонимен одмаздник, кого граѓаните на социјалните мрежи го нарекоа „Бетмен од Лагос“.
Анонимниот маж фатил и претепал петмина крадци на мотоцикли и ги врзал со индустриска леплива лента за бандери.
„Мексиканскиот Бетмен“ го оставал и својот наводен заштитен знак - на мажите врзани за бандерите им цртал мустаќи. Како што пренесуваат медиумите, одмаздникот на розово парче хартија, кое го лепел на бандерите над главите на врзаните мажи, детално објаснувал какви кривични дела сториле.
Обвинителството оценува дека совладување, претепување, пренесување и врзување со индустриска леплива лента на две лица истовремено на јавен простор не може да го изведе еден човек. Тие сметаат дека зад ова стои организирана група, а потенцијално и ривалска криминална банда.
Иако во близина на врзаните момчиња биле оставени мотоцикли, обвинителството нагласува дека е потребно правно да се утврди дали токму тие луѓе се одговорни за кражбата на тие возила.
Државниот обвинител Салвадор Гонзалез де лос Сантос потврди дека пронајдените млади лица во покренатите кривични постапки законски се третираат како жртви. Првиот случај бил забележан во населбата Ел Калварио, каде што на една раскрсница било пронајдено момче врзано за столб со натпис „крадец“.
На плоштадот во населбата Нуево Санта Марија биле пронајдени две момчиња врзани на ист начин, грб со грб, а покрај нив бил оставен црвено-црн мотоцикл за кој се сомнева дека е украден. Другите жртви биле пронајдени на други локации во градот во одделни инциденти.
Во сите случаи биле оставени картонски знаци со натписи како: „Ова ќе им се случи на сите крадци“ и „Го оставам овој крадец поради кражба на мотоцикли“.
По овие инциденти, мотоциклите за кои било пријавено дека се украдени се пронајдени и предадени на надлежните органи.
Извор:
021.rs
Фото:
Instagram