Дали некогаш сте помислиле дека кората од банана може да го напојува вашиот дом со електрична енергија или да стане облека? Револуционерна нова технологија го прави ова научнофантастично сценарио реалност.
Научниците од Универзитетот „Нортамбрија“ и нивните партнери во Пакистан успеале да го трансформираат отпадот од банана во еколошки текстил и чиста енергија.
Само во Пакистан одгледувањето банани создава огромни 80 милиони тони земјоделски отпад секоја година. Но, наместо да се остават да гнијат, оваа нова технологија го претвора овој отпад во вистинско богатство.
Како функционира?
Остатоците од банана прво се претвораат во текстилни влакна. Потоа, секој преостанат отпад добива „втор живот“ како обновлива енергија.
Најдобриот дел е тоа што ова не е само победа за животната средина, туку и за луѓето.
Целта на проектот е да испорача чиста електрична енергија на половина од рурален Пакистан. Замислете да ја замените „валканата“ енергија за чиста, електрична енергија од банана.
Д-р Џибран Калик, мозокот кој стои зад оваа операција, објаснува дека пакистанската текстилна индустрија е главен извор на загадување. Но, сега се менува текот на настаните во она што многумина го нарекуваат „револуционерно патување“.
Користејќи отпад од банана, научниците создаваат одржливи ткаенини и чиста енергија, а со тоа ги намалуваат нечистите гасови и загадувањето на водата. Процесот произведува дури и биоѓубрива, што го зајакнува здравјето на почвата и производството на храна.
Потенцијалното влијание е огромно. Научниците проценуваат дека отпадот од банана во Пакистан може да произведе неверојатни 57.488 милиони кубни метри синтетички гас - одржливо гориво за производство на електрична енергија.
Ова не е само мечтаење. Проектот има сериозна поддршка со оглед на тоа што се доделени 396.000 долари од „Иновејт ју-кеј“ за да се развие оваа технологија од отпад до енергија во текот на наредната година.
- Овој иновативен пристап не само што ќе ги трансформира земјоделските нуспроизводи во одржлив текстил, туку е и пример за извонредна синергија помеѓу екосвесните практики и технолошкиот напредок што води до локално отворање работни места и постигнување нето-нула агенда на Велика Британија - вели д-р Мухамед Сагир, уште една клучна личност во проектот.
Затоа, следниот пат кога ќе излупите банана, запомнете дека таа скромна кора би можела да ги напојува домовите и да ги облече луѓето во не толку далечна иднина.
Извор:
News.yahoo.com
Фото: Freepik