„Нетфликс“ тестира промени за споделените сметки и воведување посебни е-адреси за секој профил, што би можело да влијае врз корисниците на заедничките претплати.

Популарната стриминг-платформа и понатаму експериментира со правилата за користење. Ако мислевте дека спречувањето на споделувањето лозинки од 2023 година беше најголемиот предизвик, подгответе се за новина: „Нетфликс“ сега наводно тестира задолжителна промена која заедничката домашна сметка ја претвора во пакет од поединечни најави.

Според некои медиуми, „Нетфликс“ почнал да поттикнува одредени корисници да додадат е-адреса на секој профил, наместо сите да ја користат е-адресата на главниот сопственик на сметката.

Стандардно, една е-адреса и една лозинка ја контролираат целата сметка, додека до пет различни профили им овозможуваат на членовите на семејството да имаат одвоени листи за гледање, препораки и историја на стримување. Ако на некого му е потребен код за верификација или сака да го врати пристапот, сè оди преку е-адреса на сопственикот на сметката.

Кога е-адресата ќе се поврзе, секој профил може да добива сопствени кодови за верификација и информации за враќање на пристапот, без потреба да зависи од сопственикот на главната сметка. Оваа промена му дава малку поголема слобода на секој профил. Корисниците можат да ги контролираат поединечните поставки на профилот, а и понатаму да добиваат персонализирани препораки врз основа на историјата на гледање. Сепак, не веруваат сите дека оваа промена е воведена исклучиво од практични причини.

Ова ажурирање пристигнува само неколку години откако „Нетфликс“ ја покрена акцијата против споделувањето лозинки и го воведе концептот „Нетфликс домаќинство“, кој го ограничува пристапот до сметката на луѓе што живеат под ист покрив, но нуди и опција за доплата за дополнителни членови на некои пазари.

Оттогаш „Нетфликс“ претстави неколку алатки осмислени да го олеснат раздвојувањето на корисниците, како што е „Пренос на профил“, кој им овозможува на претплатниците да ја префрлат својата историја на гледање, препораки, зачувани игри и листи на целосно засебна сметка кога ќе ја напуштат заедничката претплата.

Поради ваквата историја на потези, некои корисници сметаат дека е-адресите врзани за конкретни профили на крајот би можеле да му олеснат на „Нетфликс“ да ги разликува поединечните корисници или во иднина полесно да ги префрли на посебни сметки.

Моментално ова ажурирање се воведува постепено. Ако стигне и до вашата сметка, додавањето е-адреса на профилот може да го олесни најавувањето, особено во многубројните домаќинства.

Сепак, со оглед на тоа што „Нетфликс“ во последно време сè повеќе го стега обрачот околу контролата на сметките, останува да се види дали ова е навистина само уште една корисна функција или почеток на нова фаза во начинот на кој компанијата управува со корисничките сметки.

Извор: Atvbl.rs
Фото: Magnific