Рекордни 930 студенти се запишале оваа година на Факултетот за информатички науки и компјутерско инженерство-ФИНКИ, што е зголемување за 13 проценти во споредба со лани.

Студентите денеска својот прв свечен час го одржаа во хотелот „Александар палас“ во присуство на премиерот Зоран Заев и министерот за информатичко општество и јавна администрација Дамјан Манчевски, кои на најдобрите ученици што успеале да се запишат со стипендија им доделија индекси.

- Драго ми е што оваа година на ФИНКИ се запишаа рекорден број - над 900 студенти, што е зголемување за 13 проценти во споредба со лани - рече премиерот Заев во обраќањето пред присутните.

Напомена дека ИТ-индустријата е највисоко растечка во светот и оти младите во Македонија го препознаваат тоа.

Заев истакна дека на ФИНКИ на младите им се нуди високо квалитетно образование и додаде оти е важно што оваа образовна институција им овозможува на студентите постојан контакт со професионалци од информатичката индустрија.

Потсети дека според статистичките податоци за јуни, просечната плата на компјутерските инженери во Македонија достигнала илјада евра, што го оцени како мошне позитивно за вкупниот економски развој на земјава.

- Нашата држава наместо да извезува квалитетни кадри, да почне да извезува квалитетни производи создадени тука - порача премиерот на првиот свечен час.

Пред студентите и гостите се обрати ректорот на УКИМ, Никола Јанкуловски, кој истакна оти следната година се одбележуваат 70 години од формирањето на Универзитетот.

- Денешниот ден ќе биде забележан во календарот на вашиот живот, станувате дел од реномираното семејство на УКИМ, најреномираниот и најстариот универзитет. Предизвиците со кои се соочувате да не ги гледате како пречка, туку како стимул за стекнување поголемо знаење - рече Јанкуловски.

Тој посочи дека оваа година на УКИМ младите имале можност да се запишат на 186 студиски програми и рече дека еден од приоритети на Универзитетот е неговата интернационализација. Министерот Манчевски рече дека тој на УКИМ се запишал во 1996 година и оти верува дека студиите на овој факултет се мошне исплатливи. Додаде дека е уверен оти студентите ќе успеат со оглед на значењето на технологијата што забрзано се развива во животот на сите нас.

- Најважно е ако отпатувате, да се вратите. Со оглед на тоа што сте запишани на овој факултет, ќе имате големи шанси да заминете во текот на студиите, но најпрвин ве молам пробајте тука - им порача Манчевски на студентите.

Деканот на ФИНКИ, Иван Чорбев, им посака срдечно добредојде на првиот час на новите академски граѓани на најголемиот електротехнички факултет во ЈИЕ.