Технологијата напредува со огромна брзина. Неодамна беа направени големи чекори во развивањето нови уреди за производство на енергија, следење на здравјето и други намени.

Енергија за интернет на нештата

Секојдневните предмети, од фрижидери до улични светилки, се поврзуваат на интернет како дел од интернет на нештата (IoT), а многу од нив се опремени со сензори кои собираат податоци. Но, на тие уреди им треба енергија за да функционираат, што е предизвик ако се на оддалечени локации. Меѓународен истражувачки тим предводен од експерти од Универзитетот „Тохоку“ создал уред кој може да претставува ефикасно и сигурно средство за самостојно напојување на сензорите.

Новиот уред за производство на енергија е направен со комбинирање на пиезоелектрични композити со полимер засилен со јаглеродни влакна, често користен лесен и силен материјал. Овој состав овозможува претворање на вибрациите од околината во електрична енергија. Овој уред може да одржува високи перформанси дури и ако е свиткан повеќе од 100.000 пати.

Материјал кој собира вода од пустинскиот воздух

Инженери од Технолошкиот институт во Масачусетс создале хидрогел кој може да ја апсорбира водената пареа дури и во пустински услови, каде што релативната влажност е само 30 отсто. Откако ќе се апсорбира од гелот, водата може да се загрее, кондензира и да се собере како чиста вода. Ефикасноста на материјалот е поголема кога во него се вшприцуваат поголеми количества литиум хлорид, вид сол што се користи како средство за сушење.

Меки електроди без метал

Друга група инженери на Технолошкиот институт во Масачусетс дизајнирале друг вид мек, спроводлив полимерен хидрогел кој може да послужи како биокомпатибилна имплантирана електрода без метал. Материјалот, кој може да се користи за правење мастило за печатење, може да се користи во медицината за производство на срцеви и длабоки мозочни стимулатори. Новиот материјал може да ги замени металите како електрични интерфејси за пејсмејкери и електронски импланти. Овој материјал сличен на желе е мек и цврст како биолошкото ткиво и може да спроведува струја слично како металите.

Медицински робот инспириран од панголин

Мал робот инспириран од панголинот наскоро би можел да врши различни безбедни и минимално инвазивни медицински процедури во телото. Истражувачите се надеваат дека роботот ќе може да пристапи до тешко достапните делови, како што се желудникот и тенкото црево, менувајќи ја нивната форма. Малиот робот може да се преклопува, загрева, да го менува обликот и да се врти. Тој може и да носи лек до ткивото.

Капки за нос за закрепнување од мозочен удар

Околу 7,6 милиони луѓе имаат исхемичен мозочен удар секоја година, а повеќе од половината потоа развиваат некакви физички или ментални нарушувања, како губење на способноста за движење на рацете или нозете, нарушувања на говорот или проблеми со депресија и анксиозност. Но, тоа наскоро би можело да се промени. Имено, невроимунолози од Универзитетот во Гетеборг претставиле капки за нос кои содржат аминокиселини кои им помогнале на глувците да закрепнат од штетните биолошки последици од мозочниот удар. Истражувачите веруваат дека овој метод на лекување би можел да се користи и кај луѓето.

Цврсти електролити за цврсти батерии

Корејскиот институт за истражување на електротехнологијата разви нова технологија која може да го отвори патот за масовно производство на евтини цврсти електролити. Оваа технологија се заснова на методот на „синтеза во еден сад“ без потреба од користење скапи литиум сулфиди и адитиви или дополнителни процеси. Овој метод е многу поевтин и побрз од традиционалните методи базирани на литиум сулфид.

Темели на куќите направени од пластични шишиња

Луѓето минатата година фрлиле 481,6 милијарди пластични шишиња во светот, создавајќи планини од отпад во огромни размери. Во исто време, повеќе од милијарда луѓе немаат каде да живеат. Еј Џеј Перез, кој е експерт за 3Д-печатење, верува дека огромната маса пластичен отпад може да стане добра основа за изградба на куќи. Тој смислил начин да ги претвори рециклираните шишиња во евтини градежни материјали за домови кои би можеле да се печатат со 3Д-печатач.

Горива од воздух и пластичен отпад

На Универзитетот во Кембриџ успеале да состават уред кој работи на соларна енергија, а го претвора собраниот јаглероден диоксид од воздухот и пластичниот отпад во одржливи горива и други вредни хемиски производи. За време на експериментите, јаглеродниот диоксид бил претворен во синтетички гас, витална компонента за еколошки течни горива, додека пластичните шишиња биле претворени во гликолна киселина, која се користи во козметичкиот сектор.

Роботски асистент што може да се носи

„Калико“ е мал робот кој може да ја закопча вашата облека за да ви помогне. Неговите креатори од Универзитетот во Мериленд замислуваат мноштво различни намени за него, вклучително и следење на вашето здравје, учење правилни техники за вежбање или едноставно како моден додаток. Со тежина од само 18 грама, роботот е прикачен на специјална лента сошиена во облеката.


3Д-печатен мотор за ракета

Британската ракетна компанија „Скајрора“ почна со тестирање на својот нов модел на 3Д-печатени ракетни мотори со цел да добие дозвола од тамошната служба за цивилно воздухопловство да изврши лансирање до орбитата. Фирмата тврди дека овој метод е 66 отсто побрз и 20 отсто поевтин од другите производни процеси.

Извор: Bug 
Насловна фотографија: Pixabay