Кратките изливи на гнев негативно влијаат врз функцијата на крвните садови, покажуваат најновите истражувања. Емоцијата на гнев и бес е најтесно поврзана со лутината. Експертите објаснуваат дека гневот е здрава емоција во некои ситуации, но сепак може да излезе од контрола и да се претвори во нездрава психолошка состојба и да го загрози функционирањето на виталните човечки органи. Лутината е во корелација со гастроинтестинални проблеми, несоница, главоболки и нарушувања на расположението.

Како малите изливи на гнев влијаат врз здравјето?

Најновата студија тврди дека дури и малите изливи на гнев можат да имаат негативно влијание врз здравјето на срцето. Истражувањето објавено во списанието на Американското здружение за срце испитало 208 луѓе. На испитаниците им биле измерени вредностите на крвниот притисок и биле земени примероци од крв пред да го кажат своето мислење за ситуацијата во која изразиле гнев, тага или вознемиреност. Забележано е дека кај овие луѓе, откако се потсетиле на непријатна ситуација, крвните садови не можеле нормално да се прошират.

- Лутината и изливите на гнев го оштетуваат функционирањето на артериите и на тој начин го зголемуваат ризикот од срцев удар - вели водечкиот автор на студијата, кардиологот д-р Даичи Шимбо од Универзитетот „Колумбија“.

Гневот влијае врз целото тело

Оваа студија ги потврдува наодите од претходните слични истражувања за негативното влијание на негативните емоции врз здравјето на луѓето. Негативните емоции го ослабуваат и имунолошкиот систем, предизвикувајќи компликации кај артритисот.

- Кога не можеме да одолееме на изливот на гнев, се јавуваат стомачни проблеми, несоница и промени во расположението - објаснува психијатарот д-р Жак Амброз од Универзитетот „Колумбија“.

Се бориме или бегаме

Во напад на гнев „се бориме или бегаме“, се активира симпатичкиот нервен систем, срцето чука побрзо, мускулите се напнати. Истражувањето тврди дека луѓето што биле во состојба на лутина или гнев биле поуспешни во решавањето загатки и задачи.

Освен што е конструктивен, гневот може да биде и нездрава емоција во некои околности, на пример, кога бурно реагираме на мала непријатност или кога ја изразуваме емоцијата на лутина подолг временски период. Експертите нагласуваат дека овој хроничен гнев многу лошо влијае врз психичкото и физичкото здравје.

Како да ги надминеме нападите на гнев?

Со цел да се ублажат и запрат изливите на продолжен гнев, експертите предлагаат техники за релаксација. Совет е да го пронајдеме она што ни дава најмногу одговори - физичка активност, дружење со пријателите, медитација, шетање во природа, длабоко дишење.

Вежбите за релаксација на мускулите ја ублажуваат физичката напнатост поврзана со чувството на лутина, вели Амброз. Се препорачуваат вежби за опуштање на мускулите на вратот, кои најчесто страдаат од напад на гнев, рамената, рацете и прстите.

Ако ниту еден од овие алтернативни начини за контролирање на изливите на гнев не нуди добри резултати, препорачливо е да посетите психолог. Можно е, објаснуваат експертите, зад хроничниот гнев да се крие биполарно афективно растројство.

Извор: eklinika.telegraf.rs

Фото: Freepik