Бројот на шумските пожари се зголемува и тоа претставува закана за екосистемите, заедниците и економиите низ светот.

За среќа, постојат нови алатки и технологии кои можат да помогнат во ублажувањето на ризиците од шумските пожари.

Овие осум најсовремени технологии имаат потенцијал да ги револуционизираат стратегиите за намалување на ризикот од шумски пожари. Вештачката интелигенција игра улога во многу од овие иновации. Од напредно предвидливо моделирање до сателитски мониторинг во реално време и технологија со беспилотни летала, овие иновации би можеле значително да ги подобрат способностите за рано откривање, брза реакција и проактивно управување со шумските пожари.

Секоја ситуација има свои уникатни карактеристики и предизвици, а овие технологии се дополнителни алатки кои би можеле да им овозможат на пожарникарите и креаторите на политиките да донесуваат информирани одлуки и да дејствуваат брзо и ефективно.

Откривање на шумските пожари од вселената

Сателитскиот надзор би можел да се користи за брзо и прецизно откривање на шумски пожари, со помош на вештачката интелигенција за препознавање шаблони. Со распоредување мини-сателити во ниската орбита, германскиот стартап „Ороратех“ снима термички снимки од Земјата, особено ноќе кога традиционалните воздушни дронови се помалку ефикасни. Оваа напредна технологија беше важна алатка за време на шумските пожари во централно Чиле и северна Алберта, Канада, брзо откривајќи пожари во оддалечените области пред тие да се рашират.

Извршниот директор Томас Грублер ја нагласува ефикасноста на нивните сателитски алгоритми, кои не само што брзо откриваат пожари, туку и ги земаат предвид факторите на животната средина како вегетацијата и влажноста. Оваа способност им овозможува на пожарникарите да им дадат приоритет на ресурсите, фокусирајќи се на шумски пожари со потенцијал да ескалираат во мегапожари од големи размери. „Ороратех“ има цел да ја прошири својата сателитска мрежа.

Паметни мапи за ризик даваат 80 отсто точност

Интерактивната карта на ризик од шумски пожари - развиена со помош на вештачка интелигенција и машинско учење базирана на историски, метеоролошки и географски податоци, постигнува стапка на точност од 80 отсто во предвидувањето на шумските пожари 24 часа пред да се случат, давајќи им на властите клучно време да се подготват и проактивно да реагираат.

Пилотската иницијатива „Фајреид“, која има цел да го намали ризикот од шумски пожари во Турција, вклучува глобална заедница, како и „Мајкрософт“, „Гугл“, НАСА и други за да го подобри предвидувањето и спречувањето на шумските пожари користејќи огромни збирки податоци. Надвор од Турција, иницијативата промовира глобална размена на знаење и интеграција на новите технологии како беспилотни летала во управувањето со пожари.

Мрежа од камери за следење на ризикот од шумски пожари

Сеопфатната мрежа од над 1.000 камери за следење шумски пожари користи напредни сензорски низи, обезбедува податоци во реално време за шумски пожари, поплави и други природни опасности низ државата.

Програмата „Алерткалифорнија“ на Универзитетот во Калифорнија, Сан Диего, претставува револуционерна иницијатива насочена кон зајакнување на подготвеноста на Калифорнија при катастрофи и способностите за одговор.

Локалното знаење ја зајакнува просторната аналитика

Интеграцијата на машинското учење во статистичкото моделирање го трансформира управувањето со шумските пожари. Овие технологии им овозможуваат на пожарникарите да го предвидат однесувањето на пожарот и стратешки да ги распределат ресурсите пред да се појават шумски пожари. Алатките како што се Индексот на тешкотија на сузбивање (Ес-ди-ај) и потенцијалните оперативни разграничувања (Пи-оу-ди) го комбинираат локалното знаење со просторната аналитика за проактивно да планираат стратегии за контрола на пожарот.

Податоци од сигналот на мобилниот телефон што го следат однесувањето на евакуацијата

Новата истражувачка алатка користи ГПС-податоци за да го предвиди однесувањето на евакуацијата од шумски пожари. Оваа алатка, развиена од меѓународен тим предводен од истражувачи од Универзитетот во Флорида и Универзитетот во Кентербери, ги следи движењата на луѓето пред и за време на шумските пожари, обезбедувајќи увид за тоа кога започнуваат евакуациите, кои патеки се избираат и кој ги игнорира официјалните предупредувања.

Далечинско набљудување може да детектира и да следи шумски пожари без да му пречи чад или темнина

Синтетички радар со отвор (Ес-еј-ар) е технологија за далечинско согледување со робусни способности за откривање и следење на шумски пожари, надминувајќи ги ограничувањата на традиционалните оптички сензори кои се борат со чад и ноќни услови. Оваа алатка обезбедува податоци со висока резолуција, во реално време за условите на теренот, помагајќи да се предвиди однесувањето на пожарот и попрецизно да се проценат ризиците.

Мобилен доплер-радар што гледа низ чадот за да даде 3Д-приказ на пожарот

Мобилен доплер-радар може да направи вистинска револуција во управувањето со шумските пожари во услови на ескалација на австралиската криза со шумски пожари. Истражувачите работат на радар, сличен на оние што се користат во метеорологијата, за следење на честичките од пепел, жар и инсекти во обрачите на чад, нудејќи 3Д-поглед на пожарите. Технологијата, која е тестирана од истражувачите од Универзитетот „Монаш“, обезбедува увид во реално време за однесувањето на пожарот, како што се неочекувани ветрови и движења на жар.

Извор: Preventionweb.net
Фото: Freepik