Премиерот на Бахамите, Хуберт Минис, денеска изјави дека најмалку пет лица загинале на островите Абако од ударот на ураганот „Доријан“, кој во меѓувреме ослабна до категорија четири, но во следните денови и натаму ќе биде многу силен.

Минис кажа дека и жителите на блискиот остров Грејт Бахама се сериозно загрозени од ураганот.

- Спасувачките екипи ќе тргнат во акција штом временските услови ќе го дозволат тоа - додаде Минис.

Според него, многу куќи и згради се значително оштетени или уништени.

- Се наоѓаме среде историска трагедија - рече Минис, пренесоа американските медиуми.

Американскиот Центар за урагани наведува дека „Доријан“ е најсилниот ураган што некогаш ги погодил Бахамите.