Австралиските научници открија некои нови и неочекувани работи за хипокампусот во човечкиот мозок.

Научниците ја создадоа досега најдеталната мапа на нервните патишта кои го поврзуваат хипокампусот со остатокот од мозокот, откривајќи неочекувани обрасци на врски меѓу регионите.

- Бевме изненадени кога откривме помалку врски помеѓу хипокампусот и фронталните кортикални области и повеќе врски со областите за рана визуелна обработка отколку што очекувавме - изјави психологот Маршал Далтон од Универзитетот во Сиднеј.

Иако сè уште постојат нејасни работи за точната улога на хипокампусот во човековата меморија, невронаучниците се убедени дека тој игра клучна улога во градењето на меморијата и нејзиното интегрирање со нашата перцепција за да ни овозможи да донесуваме одлуки за иднината. Подоброто разбирање за тоа како функционира хипокампусот во контекст со другите области на мозокот еден ден би можело да им помогне на научниците да го решат проблемот со опаѓањето на меморијата.

Користејќи нова техника за скенирање со магнетна резонанса, која користи дифузија на молекулите на водата низ ткивата за да создаде контраст, Далтон и неговите колеги создале мапа со висока резолуција на врските помеѓу хипокампусот и церебралниот кортекс од мозокот на седум жени помлади од 35 години. Студија поврзана со тоа истражување е објавена во научното списание „Илајф“.

- Сега развивме приспособен метод кој ни овозможува да потврдиме каде во рамките на хипокампусот се поврзуваат различни кортикални области. Ова никогаш не било направено во жив човечки мозок. Она што го направивме е многу подетален преглед на патеките на белата материја, кои во суштина се автопати за комуникација помеѓу различни области на мозокот - вели Далтон.

Научниците открија дека хипокампусот има различни мрежи за пораки, секоја поврзана со одредени области на кортексот. Нашето претходно знаење за овие врски доаѓа од дисекции на мозокот на приматите, а добиената мапа на мозокот е во голема мера конзистентна со претходното знаење. Но, научниците сега открија многу повисоко ниво на врски во областа за визуелна обработка на човечкиот мозок и помалку во фронталните кортикални области.

- Анализата направена по смртта на приматите може да открие поситни детали до клеточно ниво, така што е можно сè уште да не сме биле во можност да ги решиме сите овие врски кај луѓето. Или можеби човечкиот хипокампус навистина има помалку врски со фронталните области отколку што очекуваме и повеќе врски со визуелните области на мозокот. Ова има смисла имајќи предвид дека хипокампусот игра важна улога не само во меморијата, туку и во имагинацијата и нашата способност да конструираме ментални слики во нашиот ум - вели Далтон.

Други неодамнешни студии, исто така, открија врски помеѓу овие мозочни региони. Научниците сега сакаат да откријат дали слични модели се конзистентни кај луѓето од различни демографски групи.

- Како што се ширел неокортексот, можеби луѓето развиле различни модели на поврзување за да ги олеснат функциите на меморијата и визуализацијата специфични за човекот, кои пак може да ја поткрепат човечката креативност. Тоа е загатка, едноставно не знаеме, но сакаме загатки и ќе продолжиме да бараме - рече Далтон.



Извор: Science Alert
Фото: Human Connectome Project