„Нетфликс“ ја тестира најавената дополнителна политика за наплата на корисници кои споделуваат лозинки со други надвор од нивното домаќинство во три земји од Латинска Америка, но целиот проект тешко може да се нарече успешен бидејќи предизвика отпор и револт кај корисниците и многумина останаа збунети.
Во април „Нетфликс“ ја пријави својата прва загуба на претплатници по повеќе од една деценија и рече дека луѓето што ги споделуваат лозинките на нивните сметки се делумно одговорни за тоа.
Стриминг-гигантот почна да тестира построги политики во март за да ги спречи луѓето да споделуваат лозинки со други луѓе во Костарика, Чиле и во Перу.
Според условите на овој тест, на претплатниците им се наплаќа месечна претплата - еквивалент од околу 2 до 3 долари во локалната валута на секоја земја за да додадат дополнителна сметка за некој што живее надвор од нивното домаќинство.
Но, голем дел од нетфликс-претплатниците во Перу велат дека пораките за промена на политиката се збунувачки. Најголема забуна предизвика прашањето како „Нетфликс“ го дефинира зборот „домаќинство“.
Портпаролот на „Нетфликс“ изјави дека иако компанијата била свесна дека некои потрошувачи мислат дека тоа значи некој од потесното семејство на сопственикот на сметката, компанијата го дефинира домаќинството како луѓе кои делат физички престој.
- Иако почнавме да работиме на плаќање за споделување лозинка пред повеќе од 18 месеци, веќе 5 години беше јасно кажано дека нетфликс-сметката е за луѓе кои живеат заедно во едно домаќинство - изјави портпаролот.
Но, стриминг-платформата наиде на отпор од владините потрошувачки агенции во Костарика, Перу и Чиле. Перуанската агенција за потрошувачи ѝ препорача на „Нетфликс“ да ја разјасни својата дефиниција за „домаќинство“. Од агенцијата велат дека новата политика за наплата на „Нетфликс“ за споделување лозинки може да доведе до произволна дискриминација на потрошувачите.
Портпаролот на „Нетфликс“ изјави дека ќе преземе дополнителни чекори за да ги информира корисниците за дефиницијата за домаќинство.
- Милиони членови што активно споделуваат профили во овие земји се известени преку е-пошта, но со оглед на важноста на оваа промена, ние сè побавно ги зголемуваме нашите информации. Задоволни сме со досегашниот одговор - изјави портпаролот.
Извор:
Klix.ba
Фото: Freepik