Неверојатно детална мапа нуди уникатна можност да ѕирнете до работ на видливиот универзум

Научниците со години се обидуваат да најдат одговор на прашањето колку е голем универзумот?

Она за кое сите се согласуваат е дека неговата големина и толкава што сегашните мерни инструменти не можат да дадат прецизен одговор.

Но, тоа не значи дека не можеме да уживаме во него и во тајните што ни ги открива секој нов вселенски телескоп, сонда или летало.

Астрономите од Универзитетот „Џонс Хопкинс“ направија интересна мапа на која е прикажан дел од нашиот универзум составен од околу 200.000 галаксии.

Станува збор за мапа создадена од астрономски податоци кои не е можно да се прикажат сите одеднаш на 2Д-мапа. Сликата би била целосно покриена со точки кои ги претставуваат галаксиите, објаснуваат авторите.

Тие додаваат дека секоја од приближно 200.000 галаксии е прикажана во нејзината вистинска положба и боја и содржи милијарда ѕвезди и планети.

Сите оние што сакаат да го истражуваат овој мал дел од универзумот можат да си играат со мапата и да научат нешто плус за различните видови галаксии, но и да видат како изгледа работ на видливиот универзум.

Имено, прикажана е вистинска фотографија од првиот блесок на светлина емитиран кратко по големата експлозија, пред 13,7 милијарди години. Оваа светлина се протега по ширењето на универзумот и стигнува до Земјата во вид на радиобранови, а се нарекува космичка микробранова заднина.

- На мапата ние сме само дамка на самото дно, само еден пиксел. А кога велам ние, мислам на нашата галаксија, Млечниот Пат, кој има милијарди ѕвезди и планети - вели Брис Менард, еден од креаторите на мапата и професор на „Џонс Хопкинс“.

Навикнати сме да гледаме слики кои прикажуваат една галаксија овде, една галаксија таму, или можеби група галаксии. Но, она што го покажува оваа мапа е многу, многу поразлично од сѐ друго.

Брис Менард се надева дека луѓето ќе ја искусат и неоспорната убавина на мапата и нејзината неверојатна големина.