Пчелите ја разбираат математиката и можат да навигираат низ серија загатки користејќи ја основната ментална аритметика, покажуваат експериментите.

Во едно истражување што го изненади научниот свет, 14 пчели развиле концептуално разбирање за собирање и одземање, а потоа докажале дека можат и практично да го употребат.

Заклучокот дека овие мали паметни суштества имаат нумеричко познавање е значаен бидејќи посочува дека оваа способност може да се најде и меѓу инсектите.


Тим од Универзитетот РМИТ во Мелбурн учел 14 пчели да ги препознаат боите што претставувале вредност на плус или минус. Инсектите на крајот ги завршиле задачите со стапка на успешност до 75 отсто.

Претходните истражувања веќе покажаа дека пчелите може да го разберат концептот на нула, но нумеричките операции како собирање и одземање се сметаат за многу посложени бидејќи бараат две нивоа на обработка.

- Потребно е да ги следите правилата кога додавате или одземате во вашата долгорочна меморија, додека ментално манипулирате со множество на дадени броеви во вашата краткотрајна меморија. Згора на тоа, нашите пчели исто така ги искористиле своите краткорочни сеќавања за решавање на аритметичките проблеми, како што учеа да препознаваат плус или минус како апстрактни концепти наместо да им се даваат визуелни помагала - вели професорот Адријан Дајер.

14 пчели што учествувале во истражувањето биле обучени да влезат во лавиринт во форма на Y, кој се состоел од тунел со два алтернативни излеза.

На влезот на пчелите им биле прикажани разновидни „елементи“ - квадрат, дијамант, круг или триаголник - обоени или жолти или сини.

Секоја боја претставувала различна математичка опција: сина за „додавање еден“ и жолта за „одземање еден“. Откако пчелите ќе се најделе во лавиринтот, тие влегувале во „комората за одлучување“, каде што морале да изберат дали да свртат лево или десно.

Ако две сини форми биле прикажани на влезот, точната насока на „Y“ била обележана со три симболи. Ако првично биле поздравени со две жолти форми, тоа значело дека морале да летаат во насоката обележана со еден симбол (точниот одговор на задачата: 2-1).

Правилните одговори биле наградени со вкусен пијалак од шеќерна вода, додека правењето грешка било „казнето“ со горчлив раствор.

- Нашите наоди сугерираат дека напредното нумеричко сознание може да се најде многу пошироко во природата кај суштества што не се луѓе, и тоа многу повеќе отколку што претходно се мислело - вели професор Дајер.

- Ако математиката не бара масивен мозок, може да има нови начини за ние да ги вклучиме интеракциите и во дизајните на долгорочните правила и работната меморија за да го подобриме брзото учење на нови проблеми на вештачката интелигенција - додава тој.

Обуката се одржала во период од 100 испитувања. Пчелите правеле случајни избори додека не научиле како да го решат проблемот. Им биле потребни седум часа за да откријат дека сината значи „плус еден“, а жолтата „минус еден“.

Потоа пчелите ја избирале точната опција помеѓу 60 и 70 отсто од времето.

- Денес ги учиме децата дека симболот за плус значи дека треба да се додадат две или повеќе количини, додека симболот за минус значи дека се одземаат. Нашите наоди покажуваат дека сложеното разбирање на математичките симболи како јазик е нешто што многу мозоци можат да го постигнат, и помага да се објасни колку многу човечки култури самостојно ги развиле математичките вештини.