Кина сака да вакцинира до 40 отсто од своето население до јуни. За да се исполни оваа амбициозна цел, владата ги користи сите расположиви средства. Сепак, нема доволно вакцини во некои региони.
Постери, банери и видеореклами во Пекинг повикуваат на вакцинација. На интернет, по наредба на владата, апелираат докторите, телевизиските водители и оние што веќе биле вакцинирани. Тие повикуваат на одговорност на граѓаните под слоганот: „Заедно градиме голем ѕид на имунитет“.
По првата доза на вакцината се добиваат и подароци: јајца и брашно, ваучери за шопинг или билети за кино. Акцијата е водена од таканаречените „соседски одбори“, нешто како локални заедници. Во Кина, овие комитети се одговорни и за спроведување контрола на политиката на Комунистичката партија на терен.
Ву Сјаојинг е претседател на одборот Јангфагндијан во западен Пекинг. Таа на државната телевизија го претстави своето ново достигнување: шарено комби за вакцинација со шалтер за пријава, станица за вакцинирање и фрижидер.
Луѓето од соседството сметаат дека тоа е добро.
- Не сакав веднаш да се вакцинирам - вели Ши Мин, постар маж. Но, тогаш дошло шареното комбе.
- Удобно е. Тука се вакцинирав - вели тој.
Амбициозни цели
На Кина ѝ се потребни луѓе кои се подготвени да бидат вакцинирани како Ши Мин. Поради малиот број на нови случаи во Кина, многумина сметаат дека не е потребно да се вакцинираат. На некои места властите вршат притисок. Во некои региони дури има и закани дека ќе ги затворат продавниците и рестораните ако вработените не се вакцинирани. Целите на Кина се амбициозни: до јуни сака да вакцинира 560 милиони луѓе, т.е. 40 отсто од населението.
Таа цел е уште далечна. Од декември досега се дадени околу 275 милиони дози.
- Еден од нашите приоритети се регионите со висок ризик - вели Ву Лијанџу од Државната комисија за здравство. Овие региони вклучуваат пристанишни градови, погранични области, големи и средни градови, како и области каде што неодамна имало случаи на нови инфекции.
Фото: Freepik
Во некои делови од Кина нема доволно вакцини
И додека вакцинацијата се одвива добро во метрополите, во многу други региони не се одвива толку брзо.
- Во Кина многу луѓе сè уште живеат на село. Тоа ќе го забави планот на ниво на целата земја - вели Имоџен Пејџ-Џарет, аналитичарка од одделот на британскиот Институт на единицата за разузнавање на „Економист“.
Огромен предизвик
На помали места, и на север и на југоисток од Кина, честопати нема доволно вакцини. Според извештаите на медиумите, производството не успева да ги следи потребите. Покрај тоа, Кина им вети милиони вакцини на други земји. Ситуацијата ќе се подобри во наредните месеци, вети неодамна владин претставник.
Засега се користат само
кинески вакцини. Експертите проценуваат дека на Кина ѝ е потребен висок процент на вакцинирани за да го заштити населението, но домашните вакцини се помалку ефикасни од оние од Европа и САД. Затоа Кина може да достигне колективен имунитет следната година.
Затоа Пекинг се соочува со проблем: со строга политика и ригорозно затворање, ја доведе пандемијата под контрола побрзо од другите земји. Сепак, отворањето на границите може да биде подоцна отколку во другите земји. Бидејќи вакцинирањето на 1,4 милијарда луѓе претставува огромен предизвик за Кина.
Извор:
Deutsche Welle
Фото: Freepik