Католичкиот универзитет во Лувен веќе работи на вакцина против коронавирусот врз основа на веќе постојни вакцини.

Одделот за вирологија на Универзитетот во Лувен (КУЛ) има изработено технологија базирана на вакцината против жолтата треска, а која може лесно да се реплицира за да се добие нова вакцина против коронавирусот, објаснуваат научниците од виролошкиот оддел.

- Претходно успеавме да развиеме ДНК-технологија за да внесеме нов генски материјал во вакцината против жолтата треска и тоа станува еден вид база. Ја искомбиниравме вакцината против жолтата треска со таа против беснило и видовме дека се компатибилни, истото го сторивме и со вакцината против ебола и успеа, овие манипулации ни овозможија да развиеме технологија која лесно се произведува и не чини многу, а е со голема термостабилност - вели Јохан Нејтс, професор на КУЛ.

Со појавата на кинескиот вирус научниците треба да работат брзо за да развијат вакцина. ДНК-технологијата сега ќе се комбинира со геномот на коронавирусот за да се види дали ќе даде резултати. За шест до осум недели научниците ќе знаат дали вакцината е ефикасна за глувците.

- Ќе ни треба еден месец за да видиме дали произведуваат антитела и ќе има уште неколку етапи пред првите клинички тестови - вели професорот.