Позната збирка од големата српска поетеса Десанка Макисмовиќ ќе биде отстранета од програмата за четврта година гимназија, а нејзините одбрани песни ќе бидат извадени од програмата за трета година гимназија во Србија.

Според локалните медиуми, во рамките на промената на програмата за наставата по српски јазик и книжевност во гимназиите, комисијата на Заводот за унапредување на образованието и воспитувањето одлучила да ги извади одбраните песни на Десанка Максимовиќ од трета година, а нејзината збирка „Барам помилување“ ќе биде извадена од програмата за четврта година.

Оваа одлука предизвикала негодувања од страна на писателите, критичарите, просветните работници и универзитетските професори. Од фондацијата „Десанка Максимовиќ“ реагирале на одлуката со писмо до Министерството за образование, Националниот образовен совет и Заводот за унапредување на образованието и воспитување.


- Прекројувањето на книжевната историја и несомнените вредности на српскиот книжевен канон преку целокупното дело на Десанка Максимовиќ, со кое треба да се запознаат средношколците од трета и четврта година, е, благо речено, нешто што директно го погодува срцето на нашиот идентитет - изјавила Светлана Шеатовиќ, управител на фондацијата.

Десанка Максимовиќ е српска поетеса која живеела од 1898 до 1993 година. Нејзините дела се преведени на многу светски јазици, а некои нејзини песни се влезени во светски антологии. Меѓу другите награди, во 1988 таа била одликувана со „Златен венец“ на Струшките вечери на поезијата.

Извор: b92.net