Кога некој не може да се сети на нешто, често се вели дека има меморија како рипка. Имено, долгогодишното верување кое многумина го сметаат за научна вистина е дека златната рипка има меморија од само три секунди. Но, дали е тоа воопшто вистина?

Според експертот кој е специјализиран за проучување на рибите и нивното однесување, професор Калум Браун од Универзитетот „Мекквари“ во Сиднеј, ова е мит кој нема врска со реалноста. Вистината е дека златните рипки, како и речиси сите други риби, имаат беспрекорна меморија во препознавањето на местата каде што се движат, па дури и во препознавањето на идентитетот на другите риби.

Додека повеќето луѓе веруваат дека златните рипки имаат кратко сеќавање, научниците кои ги проучуваат рибите долго време се запознаени со нивните импресивни когнитивни способности. Браун вели дека митот за три секунди не важи само за златните рипки, туку за рибите воопшто, но доколку такво нешто е вистина, прашање е како таквите животни би можеле да се снајдат и преживеат во реалниот свет, односно не би можеле усвојуваат нови однесувања или научат како да се прилагодат на промените во нивната околина.

За да ги докаже когнитивните способности на рибите, професорот Браун спровел експеримент во кој ставил една риба во резервоар со минијатурен модел на мрежа. Направил дупка во мрежата низ која рибата можела да избега и да се спаси. Додека го повторувал овој експеримент, забележал дека рибите стануваат сè побрзи во пронаоѓањето на дупката за бегство. По четири или пет експерименти, рибата мирно пливала пред мрежата и одеднаш се свртела и испливала право низ дупката. Воопшто не морала да ја бара, веднаш знаела каде е.

Но, Браун бил особено импресиониран кога го направил истиот експеримент 11 месеци подоцна. Истата риба и истата мрежа ја ставил во аквариумот, а рибата од првпат ја пронашла дупката во мрежата, што доволно говори за нејзините когнитивни способности и меморија, што значи дека се многу подобри во споредба со перцепцијата на јавноста.

Браун потсетува на други студии кои покажале слични резултати и нагласува колку риби, по години поминати на море, можат да се вратат на нивните места за размножување.

-Сите знаеме како пастрмката и лососот се враќаат на истото место каде што се размножуваат секоја година.

Овој професор споделил уште една теорија која е од корист за когнитивните способности на рибите. Имено, тој вели дека имаат способност да се препознаат и претпочитаат дружење со риби кои веќе ги запознале.

Извор: zimo.dnevnik.hr

Фото: Freepik