Што се по професија новите 120 пратеници во македонското Собрание, како Душко Ристовски ја доживеа разорната експлозија, оддалечен само 2 километра од пристаништето во Бејрут, зошто учениците треба да тргнат на редовна настава според епидемиологот д-р Харис Бабачиќ, што нудат во своите студиски програми Факултетот за електротехника и информациски технологии (ФЕИТ) и Факултетот за земјоделски науки и храна при Универзитетот „Св. Кирил и Методиј“? Ова се дел од темите за кои пишувавме неделава.
За празникот Илинден објавивме текст „Каде студирале медицина докторите што ги лекувале ранетите илинденци“. Кој се грижел за ранетите востаници и за болните во времето на Крушевската Република? Имало ли образовани лекари, како бил организиран тогашниот здравствен систем?
Колумнистката Елизабета Секирарска, професорка во средно училиште, пишуваше на тема: „Родителството во лавиринтите на искривоколчени вредности, на деформирани визири, на тешко прифатлив апсурди“. За тоа како е да се биде родител. Да се биде носител на најодговорната истовремено и привилегија и обврска, во овие мачни времиња на искривоколчени вредности, на деформирани визири, на тешко прифатливи и објасниви апсурди кои како животен амбиент се баласт и за нас возрасните.
Владите се менуваат, проблемите во високото образование остануваат! Кои се петте најважни задачи на новиот министер, образложува проф. д-р Елена Думова-Јованоска од Градежниот факултет на УКИМ, која беше и проректор за настава (2008-2012). Ова се нејзините размислувања.
Најмногу правници, економисти и лекари, еден генерал во пензија и еден студент - во новиот парламент. Собранието ги отвори вратите за десеттиот парламентарен состав од осамостојувањето на земјата. Во собраниските фотелји седнаа 77 пратеници и 43 пратенички, а нивната просечна возраст е 45 години. Какво образование има новиот парламентарен состав?
Жестоки реакции поради поскапувањето: За колку ќе бидат повисоки новите сметки за струја? Кој најмногу ќе го почувствува и што всушност значи повисоката цена за струја за 7,4 отсто што минатата недела ја одобри Регулаторната комисија за енергетика - РКЕ, т.е. како поскапувањето ќе биде пресметано во крајната сума што месечно се плаќа почнувајќи од септември? Поради поскапувањето има и барања да се намали данокот на додадена вредност - ДДВ, со што практично и би се намалиле месечните сметки.
Кај децата многу ретко се јавува тешка клиничка слика при SARS-CoV-2 инфекција, а ризикот од смртен исход од болеста Ковид-19 кај нив практично речиси не постои. Затоа, сметам дека учениците треба да се вратат на училиште и да имаат целосни, нескратени часови, вели д-р Харис Бабачиќ, магистер по епидемиологија и докторанд-истражувач. Целиот текст прочитајте го тука.
Какви услови за студирање им нуди Факултетот за електротехника и информациски технологии (ФЕИТ) на своите студенти. Има многу причини зошто матурантите треба да го одберат ФЕИТ за да го продолжат своето образование, а една од нив е што нема сомнение дека развојот на општеството сѐ повеќе се базира на знаење и иновации, вели во интервјуто деканот на ФЕИТ, проф. д-р Димитар Ташковски.
Македонскиот јазик го изучуваат дури 110 студенти на Истанбулскиот универзитет! Како се приспособија лекторатите по македонски јазик на онлајн-наставата? Каков е интересот за изучување на македонскиот јазик во светот? Разговаравме со проф. д-р Весна Мојсова-Чепишевска, која е директорка на Меѓународниот семинар за македонски јазик, литература и култура.