Вкупно 70 пациенти ќе носат нараквици со вграден ГПС. Ако се обидат да побегнат, безбедносниот систем ќе алармира. Сите простории во зградата се под видеонадзор, а стаклата на прозорците се непробојни. Во зградата можат да влезат само лица што имаат чип-картичка.

Тие се извршители на најтешките казнени дела - убиства, силувања, нанесувања тешки телесни повреди, а прогласени се за непресметливи во моментот на извршување на злосторството. Од први јануари идната година тие ќе бидат сместени во новата зграда на Заводот за форензичка психијатрија сместен од западната странa на Клиниката за психијатрија „Врапче“ во Загреб. Станува збор за нова зграда, која ќе биде отворена на 15 ноември.

Првите форензички пациенти во болницата „Врапче“ се бележат од 1882 година, три години по отворањето. За разлика од сегашниот завод, чии простории се неадекватни, новиот завод е уреден по највисоки светски стандарди. Ќе има четири оддели - за акутно лекување, за интензивно лекување, за лекување и рехабилитација и дневна болница. Површината на зградата е 4.700 квадратни метри и таму ќе бидат сместени 70 пациенти. Собите се еднокреветни и двокреветни. Дел од опремата, душеците и креветите веќе се пристигнати во заводот и сега треба да се разместат. Пациентите ќе бидат сместени на приземјето и на првиот кат.
Собите на пациентите имаат меѓу 10 и 20 квадрати. Сите имаат класична влезна врата, освен оние на одделот за акутно лекување. Тоа е оддел каде што пациентите се сместуваат веднаш по доаѓањето во заводот и таму се месец или два, додека лекарите не ги запознаат. Влезните врати на собите во тој оддел имаат прозорчиња за да можат вработените во секој момент да видат што се случува во собата, а да не мора да влегуваат. И на приземјето и на катот има видеоцентри од кои во секој момент ќе се следат сите случувања во зградата.

Безбедноста ќе биде загарантирана, но нема да има професионални обезбедувачи бидејќи, како што велат вработените, тие ја расипуваат терапевтската атмосфера.