Добро познатиот онлајн сервис за дистрибуција на фотографии, видеа и музика „Шатерсток“ им ја пренесува својата содржина на компании фокусирани на вештачка интелигенција (ВИ). „Опен АИ“, „Мета“, „Гугл“, „Амазон“ и „Епл“ се нови партнери на „Шатерсток“, кои ќе користат над 400 милиони слики, видеа и музика за обука и развој на нивните модели. Бидејќи се очекува овие партнерства да покренат одредени правни и етички прашања, „Шатерсток“ се обидува да подготви, а и веќе создаде фонд за компензација на авторите.

Клиенти: „Опен Аи“, „Епл“

Од „Шатерсток“ потврдиле дека веќе имаат потпишано договор за партнерство со Еј-би-си. Ова ќе им овозможи на клиентите пристап до збирки на податоци кои се од клучно значење за развој на апликации кои се движат од е-трговија до автономни возила.

Роџер Барга, генерален менаџер за машинско учење во „Амазон веб сервиси“ (АВС), ја истакнал улогата на „Шатерсток.АИ“ како клучен ресурс за нивните проекти.

- Редовно се потпираме на „Шатерсток.АИ“ за пристап до една од најголемите колекции на фотографии, векторски графики и илустрации - рекол Барга.

Минатата година „Шатерсток“ почна да работи со „Опен АИ“ и потпиша шестгодишен договор кој ветува дека ќе обезбедат целосен пристап до нивната содржина, вклучувајќи метаподатоци кои се клучни за обука на модели со вештачка интелигенција. Ова партнерство го отвора патот за интеграција на технологиите на „Опен АИ“ во рамките на платформата „Шатерсток“.

Учеството на „Епл“ во овој тренд, преку договорот со „Шатерсток“, укажува на сериозните намери на компанијата да ги прошири своите способности за вештачка интелигенција. Ова е особено значајно со оглед на претстојното лансирање на „иОС 18“, кој секако ќе биде богат со опции за вештачка интелигенција.

Сите тргуваат

Секој што има каква било содржина е вклучен во правење договори и креирање профитабилни работни места. Услугите кои се заборавени дека постојат, на пример, „Фотобакет“, основана во 2003 година, сè уште функционираат. Некогаш имало 70 милиони, а денес има само 2 милиони корисници. Извршниот директор Тед Леонард, кој ја води малата компанија со 40 вработени, изјавил дека е во преговори со неколку технолошки компании за лиценцирање на архивите на „Фотобакет“. Тие имаат 13 милијарди фотографии и видеа кои ќе бидат лиценцирани да обучуваат генеративни модели со вештачка интелигенција. Леонард наведува цени за лиценцирање од 5 центи до 1 долар по фотографија и повеќе од 1 долар по видео, но цената ќе зависи од купувачот и видот на медиумот што се бара. Очигледно се преговара како на пазар, во смисла „кој ќе даде повеќе“.

Поновите компании исто така не спијат. „Дефајнд.аи“, компанија со седиште во Сиетл, објави дека ги лиценцирала своите податоци за голем број водечки технолошки компании, вклучувајќи ги „Гугл“, „Мета“, „Епл“, „Амазон“ и „Мајкрософт“. Тие имаат слики, видеа, текстови и аудиопарчиња кои ќе се користат за обука на модели со вештачка интелигенција. Цените за лиценцирање податоци варираат во зависност од клиентот и видот на содржината. Според Даниела Браза, извршен директор на компанијата, компаниите генерално се подготвени да платат долар или два по слика, два до четири долари за кратко видео, сто до триста долари на час за подолги филмови и 0,001 долари за збор од текст. Сликите со голотија, кои бараат најделикатна обработка, чинат од пет до седум долари.

Правни и етички дилеми

Ваквите договори и партнерства покренуваат правни и етички дилеми, особено во однос на авторското право и надоместокот за оригиналните автори. Дури сега излегуваат на виделина тајните на операциите, додека, во почетокот на создавањето на големите јазични модели податоците се земаа од секакви извори на интернет. Почнати се дури и меѓусебни обвинувања. Нил Мохан, извршниот директор на „Јутјуб“, ги изразил своите ставови за етичките аспекти на користењето на податоците на платформата, за целите на развој на вештачка интелигенција (ВИ).

Разговорот се осврнал на прашањата за приватноста на податоците, интелектуалната сопственост и идната улога на технологиите за вештачка интелигенција во самата платформа. За време на интервјуто, Мохан се пожалил дека „Опен АИ“ го вчитува својот модел „Сора“ преку инфраструктурата на „Јутјуб“. Пораката гласи: „Употребата на содржината за развој на технологијата за вештачка интелигенција подлежи на строги правила и договорни обврски“.

ФТЦ како полицаец за вештачката интелигенција

Додека компаниите за вештачка интелигенција и нивните партнери тивко ги менуваат условите за користење, Федералната трговска комисија (ФТЦ) предупредува на својата веб-страница:

- Неправедно е ретроактивно да се менуваат политиките за приватност, без јасно и видливо известување на корисниците. Корисниците имаат право да знаат како се користат нивните податоци и мора да имаат можност да се согласат за таквото користење.

Извор: Bug.hr

Фото: Freepik