Кога размислувате за грижа за себе и здрави навики, веројатно мислите на добро јадење, редовно вежбање и доволно спиење. За жал, за многу луѓе притискањето на копчето „снуз“ често е првото нешто што се случува кога стресот почнува да се трупа. Веројатно сте слушнале дека ви требаат седум или повеќе часа сон во текот на ноќта за да се чувствувате добро, но кое е најдоброто време за спиење и дали е навистина важно?

Може да забележите пад во продуктивноста кога сте прилично исцрпени. Со текот на времето, хроничното лишување од сон може да придонесе за голем број здравствени проблеми, вклучувајќи срцеви заболувања, дијабетес, дебелина, болка, ментални здравствени состојби, хормонски абнормалности и намален имунитет, според Фондацијата за спиење.

Во продолжение, експерт за спиење објаснува зошто е важно да имате конзистентна и здрава рутина за спиење и што треба да знаете за да добиете квалитетен сон.

Колку часа сон навистина ви се потребни?

Американската академија за медицина на спиењето (AASM) препорачува возрасните да спијат најмалку седум часа навечер.

- Опсег од седум до осум часа сон во текот на ноќта обично е доволно за повеќето возрасни да се чувствуваат добро одморени во текот на денот - вели Мехвиш Саџид, доктор на науки, соработник на Центарот за здравствени нарушувања на спиењето на Универзитетот во Мичиген.


Ако се будите со чувство на умор или не сте свежи наутро, д-р Саџид препорачува да разговарате со вашиот лекар за да бидете сигурни дека ништо друго не се случува.

Една неодамнешна студија посочува дека најдобро време за легнување е 22 часот.

- Најдоброто време за спиење е кога се чувствувате поспани - забележува д-р Саџид.

- Понекогаш, луѓето можат да направат грешка и да си легнат пред да бидат уморни, а потоа ќе лежат в кревет будни со надеж дека ќе заспијат.

Ако не можете да заспиете, д-р Саџид препорачува да се минимизира изложеноста на светлина (особено од вашиот паметен телефон) еден до два часа пред спиење.

Дали треба да си легнувате во исто време секоја вечер?

Треба да си создадете некаква навика пред спиење, вели д-р Саџид.

- Легнувањето во исто време секоја вечер ви овозможува да одржувате постојан деноноќен ритам, што е природен часовник за спиење и будење на вашето тело. Вашиот деноноќен ритам го контролира вашиот нагон за спиење и влијае врз будноста во текот на денот.

Што можете да направите за да имате добар сон?

Ако сте се бореле со заспивањето, бидете сигурни дека има надеж. Следниве совети можат да ви помогнат, според д-р Саџид:

- Читајте книга пред да легнете.
- Избегнувајте да гледате во екрани со задно осветлување или да гледате телевизија во рок од 30 минути пред спиење.
- Не јадете голем оброк непосредно пред спиење. Ако сте гладни, каснете нешто полесно, но ограничете го внесот на течности.
- Погрижете се вашата соба за спиење да биде ладна и темна.
- Обидете се да не дремнувате доцна попладне.
- Ограничете го кофеинот.