Тајни болници на Филипините нудат услуги за пластична хирургија за бегалците и операторите од измамничките кол-центри, за да им помогнат да избегнат апсење, велат властите.

Две такви нелегални болници би можеле да бидат затворени во следниот период, по полициската рација на една од нив, изјавил портпаролот на полицијата.

Алатки за трансплантација на коса, забни импланти и интравенски капки за избелување на кожата биле запленети од болница во Пасај Сити пред два месеца.

- Можете да направите сосема нова личност со сето тоа - изјавил Винстон Џон Касио, портпарол на Претседателската комисија за организиран криминал.

Се верува дека двете нелегални болници се четири пати поголеми од онаа во Пасај. Меѓу клиентите, наводно, се и оние од онлајн казина што работат нелегално на Филипините. Онлајн казина или „Погос“ (Филипински онлајн операции за игри) се грижат за играчите во Кина, каде што коцкањето е нелегално. Но, полицијата вели дека „Погос“ служи како покритие за криминални активности, како што се телефонски измами и трговија со луѓе.

Во рацијата во Пасај биле уапсени тројца лекари, двајца од Виетнам и еден од Кина, заедно со кинески фармацевт и виетнамска медицинска сестра, од кои ниту еден немал дозвола за работа на Филипините. Пронајден е и апарат за хемодијализа, што покажува дека објектот од 400 квадратни метри, покрај пластична хирургија, нуди и разни медицински третмани.

- Однадвор изгледаат како обични клиники, но кога ќе влезете, ќе се шокирате од технологијата што ја имаат. Овие болници во Погос не бараат валидни лични карти, може да бидете бегалец или странец на Филипините и нелегално да престојувате овде - истакнал Касио.

До властите било пријавено дека во градот Пасај Сити има нелегални болници. Бизнисот во Погос процветал под владеењето на поранешниот филипински претседател Родриго Дутерте, кој се обидел да воспостави пријателски врски со Кина за време на неговиот шестгодишен мандат, кој завршил во 2022 година. Сепак, неговиот наследник Фердинанд Маркос Џуниор почнал да ги растура овие фирми наведувајќи ги нивните врски со криминалот.

- Претседателот не сака Филипините да се окарактеризираат како „центар за измама“ и ни даде директива да тргнеме по нив бидејќи тие беа насочени кон голем број луѓе од целиот свет - рекол Касио.