Некогаш на социјалните мрежи се докажуваше колку пријатели имате. Новиот вид инфлуенсери ја собираат својата публика токму на тоа што ги немаат. 22-годишната лондончанка Тес Лаванда објави видео на „Јутјуб“ со наслов „Немам пријатели“. За еден месец видеото собра повеќе од половина милион прегледи. На „Инстаграм“ најдобро ѝ поминуваат снимките како „Наполнив 22 години сама“, „Живеам сама во Лондон“ или „Во ред е да се чувствувате осамени ова лето“.

Не е единствена. Поимот „solomaxxing“ (соломексинг), „loneliness influencer“ (инфлуенсер за осаменост) и „no friends aesthetic“ (естетик без пријатели) веќе водат до стотици видеа, главно од тинејџери и млади возрасни лица. Форматот е намерно обичен: враќање од работа, вечера за едно лице, расчистување на станот, гледање телевизија, заминување во кревет. Она што до неодамна на мрежите се криеше зад фотографии од друштво и излегувања, сега се снима, се монтира и се објавува. Некои ја прикажуваат самотијата како слобода од општествените очекувања, додека други отворено зборуваат за осаменоста. Лаванда го снимила првото такво видео додека се спремала сама да излезе, повеќе за да се охрабри себеси отколку поради публиката.

Во Англија, уделот на млади луѓе без ниту еден близок пријател од 2014 година пораснал за петпати, покажа новото истражување на Институтот за истражување на јавните политики. Пораснал и бројот на оние што не се задоволни од пријателствата што ги имаат. Пандемијата затвори дел од местата каде што настануваат таквите односи, работата од дома не ги врати повеќето, а излегувањето сè почесто подразбира пари кои младите ги немаат. Истовремено, голем дел од дружењата се преселија во групни разговори и на платформи каде што е можно да се биде постојано поврзан, а сепак да се помине денот без ниту една средба.

Истражувачите не тврдат дека денешните млади се поосамени од претходните генерации бидејќи токму возраста меѓу 14 и 24 години и порано била период во кој осаменоста најчесто се пријавувала. И парадоксално: Тес Лаванда вели дека нема пријатели. Луѓето кои, исто така, немаат пријатели се собраа под нејзиното видео и создадоа друштво.

Извор: Vecernji.hr
Фото: Magnific