Се чини дека класичните лежечки полицајци полека заминуваат во историјата, барем во поразвиените делови на Европската Унија. Имено, нови лежечки полицајци се поставени во некои шведски градови како Карлстад, Упсала, Малме, а се шират и на Исланд, во Норвешка, Германија.
За што станува збор? Секој комплет на шведската компанија „Едева“ се состои од надзорна камера и активен забавувач на сообраќајот. Оние возачи што возат според ограничувањата на брзината нема ни да го почувствуваат забавувачот бидејќи тој ќе остане на висината (нивото) на патот. Ако возачот е побрз од ограничувањето, забавувачот ќе се спушти на неколку сантиметри и кога автомобилот ќе помине преку него, ќе почувствува удар.
Така се казнуваат само возачите што возат побрзо од ограничувањето, а сите други ќе поминат без последици, односно суспензијата на автомобилот нема да биде изложена на постојани удари и нема да страда. Пред самиот забавувач има и сообраќаен знак за известување.
Од „Едева“ велат дека независните процени покажале дека системот ја намалува бучавата, го подобрува протокот на сообраќај и ја намалува брзината.
Фото: Screenshot/Youtube