„Нирвана“ ќе ја добие наградата „Видео вангард“ на доделувањето на видео-музичките награди (ВМА) 2026 на Ем-ти-ви, кое ќе се одржи на 27 септември во театарот „Пикок“ во Лос Анџелес.

Триото ќе биде првиот бенд што го добил ова признание од „Дјуран дјуран“ во 2003 година. Ќе биде и првиот бенд што ќе ја добие наградата по распадот уште од „Битлси“ во 1964 година.

Ем-ти-ви на „Инстаграм“ наведе: „На денешен ден во 1992 година Нирвана првпат излезе на сцената на ВМА - засекогаш менувајќи ги музиката, културата и Ем-ти-ви.“

Во соопштението на „Ем-ти-ви“ не е споменато името на Мајкл Џексон, кое понекогаш се додава на називот на оваа награда, а понекогаш не, пишува „Билборд“.

„Нирвана“ стигна на насловните страници во јануари 1992 година кога албумот „Nevermind“ го потисна „Dangerous“ на Џексон од првото место на листата „Билборд 200“.

„Нирвана“ е деветтиот бенд што ја добива наградата „Видео вангард“, по „Битлси“ (1984), „Бон Џови“ (1991), „Ганс енд роузис“ (1992), „Ролингстонс“ (1994), „Р.Е.М.“ (1995), „Бисти бојс“ (1998), „У2“ (2001) и „Дјуран дјуран“ (2003).

„Нирвана“ три години по ред ја освојуваше наградата за најдобар алтернативен спот на ВМА: за „Smells Like Teen Spirit“ во 1992, „In Bloom“ во 1993 и „Heart-Shaped Box“ во 1994 година.

„Smells Like Teen Spirit“, вистински класик кој дефинира една генерација, и „Heart-Shaped Box“ беа номинирани и за видео на годината, но изгубија од песните „Right Now“ на групата „Ван Хален“, односно „Cryin'“ на групата „Еросмит“.