Психолошкото советувалиште на УКЛО, коe од почетокот на ковид-кризата започна со телефонски советувања за студентите и вработените, во рамките на мерките на Универзитетот за поуспешно справување со пандемијата, воведува нови форми и начини на работа.

Според стручниот тим од ова советувалиште, психологот, проф. д-р Драгана Батиќ и вишиот предавач, д-р Гордана Ристевска-Димитровска, специјалист психијатар, студентите од УКЛО, особено оние што имаат некои психички манифестации на страв или паника, анксиозност или кое било друго чувство во врска со вирусот, заслужуваат да бидат сослушани и да добијат соодветна психолошка поддршка и можат да се консултираат за сите тешкотии што ги имаат, или пак да разрешат некои дилеми и развојни проблеми што се присутни кај  младите луѓе.

Д-р Гордана Ристевска-Димитровска посочува дека закажувањето термини се одвива преку веб-страницата на УКЛО, односно преку рубриката брзи линкови, по пристапот до Психолошкото советувалиште се одбира професор – терапевт и по пополнување краток формулар, професорот и студентот се договараат за термин и начин на изведување на советувањето. Психолошкото советувалиште на УКЛО од почетокот на корона-кризата ја прошири својата функција и нуди советувања и за вработените. Ставот на Универзитетот е дека унапредувањето на работата на првото студентско психолошко советувалиште е неминовно и нужно поради комплицираниот период во кој живееме, кога е потребно уште повеќе да се грижиме за менталното здравје.


Стручниот тим на УКЛО од психолошкото советувалиште со особена грижа и посветеност, во континуитет ги подобрува пристапите и начините за зачувување и негување на менталното здравје, нагласувајќи: „Оваа  ситуација е кризна од повеќе причини: постои можност да се разболиме ние или нашите блиски, ни се прекина животната рутина (секојдневните обврски), ни се прекинуваат физичките контакти и мораме да седиме дома. Ваквата ситуација е нова за сите нас и вклучува неизвесност која може да создаде чувство на анксиозност, страв, паника. Во тие моменти добро е студентите да имаат психолошка поддршка, да се обратат до стручно лице (психолог, психијатар). Со оглед на тоа што советувалиште за студенти веќе постои, сметавме дека и во овие услови треба да продолжиме во согласност со сегашната ситуација. Сакаме да ги поттикнеме студентите да се грижат за себе, да не се заплашуваат себеси така што ќе читаат неселективно и ќе ги впиваат сите информации (потребни и непотребни) што само ја зголемува паниката, да се опуштат, да вежбаат, да прават нешто што им причинува задоволство и да учат, бидејќи тоа ќе им ги одврати мислите што продуцираат страв. Во оваа ситуација е неопходно да се биде активен, затоа што активноста и структурираното време ќе го намалат стресот. Стресот во овие околности е всушност „нормална реакција на ненормална ситуација“, така што кога е во прашање коронавирусот, не можеме да го исклучиме, но затоа можеме да го контролираме. За тоа постојат многу начини, техники на длабока релаксација, вежбање, дишење и сл. Битно е стресот да се препознае и да се контролира. Значајно е студентите да знаат дека не се сами, дека ние, и како професионалци за ментално здравје и како нивни професори, сме тука да им дадеме поддршка и да ги охрабриме за полесно да ја надвладеат оваа ситуација“.  

Психолошкото советувалиште на УКЛО е воедно и прво од ваков вид во државата и започна со работа во две единици на универзитетот: Факултет за безбедност-Скопје и Високата медицинска школа во Битола, како единици во кои имаше услови за оваа дејност. Психолошкото советувалиште првенствено е наменето за студентите со цел да им укаже помош во совладување на тешкотиите при снаоѓање во средината во која живеат/дејствуваат - семејството, факултетот и општеството воопшто, како и во успешното остварување на емоционалните и социјалните односи и сопствената индивидуалност и самостојност. Неговиот видоизменет и проширен начин на работа наиде на пофалби од страна на јавноста поради професионалниот, навремен и одговорен пристап на советувалиштето како одговор на УКЛО на новонастанатата ситуација предизвикана од пандемијата на Ковид-19.