Ако не по своите дела, Барак Обама во историјата ќе остане запомнет како првиот претседател на Америка од афроамериканско потекло. Овие дена треба да ја напушти Белата куќа, а „Netflix“ вчера објави трејлер за биографската драма „Barry“ - филм за студентскиот живот на Обама.
Главната улога во драмата под режисерската палка на Викрам Ганди ќе ја толкува актерот Девон Терел, а во филмот се појавуваат и Ешли Џад, Ања Тејлор-Џој и Џена Елфман. Трејлерот прикажува некои од препреките со кои Обама се соочил во текот на студиите, како расистичкиот испад на полицајците, а составен дел од филмот е и романтичната приказна помеѓу претседателот и една девојка.
И самиот режисер Ганди и авторот на сценариото Адам Мансбах биле студенти на Универзитетот во Колумбија, исто како Обама.
Премиерата на филмот е закажана за 16 декември 2016 година.