Mинистерот за економија Крешник Бектеши соопшти дека утре ќе се замрзнат цените на оризот и на јајцата.

Како што рече денеска на прес-конференција во Владата, кај шеќерот и брашното нема да се интервенира со замрзнување зашто веќе има намалување на цените на овие производи и тој тренд се очекува да продолжи.

Бектеши не кажа конкретно на која цена ќе биде замрзнувањето, но извесно е дека тоа нема да биде денешната, туку од некој друг претходен ден во март.

Според него, моментно цените на јајцата во земјава се најниски во споредба со другите земји од регионот, а поскапување поради претстојните празници нема да се дозволи.

- Очекуваме цените на шеќерот и на брашното сами да паѓаат, а и веќе бележат намалување, но ако тоа не се случи од страна на трговците, до крајот на оваа или почетокот на идната недела ќе има дополнителни одлуки за цените на овие производи - истакна Бектеши.

Од 16 март се замрзнати цените на тестенините и на млечните производи, а од 28 февруари е замрзната и цената на лебот. Тогаш, согласно владините одлуки, се укина и субвенционираната струја за компаниите од прехранбената индустрија.