Оддалечена природна знаменитост во Северната Територија официјално е прогласена за меѓународно засолниште на темното небо, со што стана првата локација од ваков вид на оваа територија и дури третата во Австралија.
Резерватот Карлу Карлу се наоѓа на околу 100 километри јужно од Тенант Крик и е познат по древните гранитни карпи.
Речиси целиот резерват, кој се простира на 1.800 хектари, претставува свето подрачје кое е од големо значење за традиционалните сопственици од народите Кајтети, Варумунгу, Валпири и Аљавара.
Меѓународните засолништа на темното небо се подрачја препознатливи по исклучително чистото ноќно небо и заштитената природна средина. Обично се наоѓаат во оддалечени предели со многу мало светлосно загадување и имаат научно, еколошко, образовно или културно значење.
Добивањето на овој статус е многу сложен процес, а во светот постојат само 24 признати локации.
Во Австралија овој статус претходно го добиле засолништето за диви животни Аркарула во планинскиот венец Флиндерс во Јужна Австралија во 2023 година и Австралискиот музеј за природна историја „Доба на диносаурусите“, кој се наоѓа на висорамнината Џамп-Ап во Квинсленд, во 2019 година.
Прогласувањето на Карлу Карлу следуваше по пријава предводена од Одделот за туризам и угостителство, со поддршка од традиционалните сопственици и локалните власти.
Добивањето на статусот подразбираше „опсежен едногодишен процес“, кој го предводела Службата за паркови и диви животни на Северната Територија. Процесот вклучувал шестмесечно мерење на ноќното небо за да се утврди степенот на темнината, анализа на вештачкото осветлување и процена на идните ризици за зачувување на ноќното небо.
Филип Кован, виш директор на Службата за паркови и диви животни на Северната Територија, вели дека ова признание претставува обврска ноќното небо да се заштити и промовира.
Според него, светлосното загадување ќе мора да се зема предвид при секој иден развој на ова подрачје.
- Карлу Карлу има едно од најтемните неба во светот. Можете да ги набљудувате Млечниот Пат и соѕвездијата без никакво светлосно загадување и возбудени сме што можеме да им го претставиме тоа на нашите посетители - вели Кован и додава дека зачувувањето на ноќното небо без светлосно загадување им помага на домашните животни, но е добро и за човековото здравје.
Директорката на организацијата „Туризам и настани НТ“, Сузана Бишоп, вели дека признанието е одлична вест и за туристичкиот сектор и за идното зачувување на ова посебно место.
- Меѓународното признание го става овој регион на мапата и ја збогатува нашата понуда за посетителите кои бараат јасен поглед кон небото преполно со ѕвезди - вели таа.
Извор:
The Guardian
Фото: Screenshot/YouTube