Денеска во 18 часот во скопската гимназија „Орце Николов“ ќе се одржи „Орцашка вечер на поезијата“. Настанот го организираат професорката по македонски јазик и литература Драгица Јанкуловска и учениците Емрах Јусуфоски, Јована Стаматовска, Деспина Стојмировска и Карло Јовановски.
Организаторите велат дека Светскиот ден на поезијата, Денот на пролетта и одбележувањето на почетокот на „Деновите на Орце“ ќе се проследат преку стиховите на млади поети и поетеси, кои со огромна емоција и извонредна интерпретација ветуваат дека ќе допрат до душите на сите присутни.
На поетското читање, кое има цел да ги собере сите љубители на поезијата и уметноста, ќе присуствуваат поетите и поетесите Ана Голејшка, Билјана Стојановска, Владимир Мартиновски, Јулијана Величковска и Никола Маџиров, како и сегашни и поранешни ученици во „Орце Николов“.