Стратегијата за заживување на туризмот на Тајланд вклучува привлекување само богати туристи кои бараат приватност и социјално дистанцирање во ерата на Ковид-19, наместо привлекување голем број туристи.

Пандемијата нуди можност за промена во секторот, кој на Тајланд стана многу зависен од кинеските групи и штедливите туристи. Откако Тајланд ќе ги отвори границите и ќе се договори за таканаречените „патувачки балони“ со другите земји, сите маркетинг-кампањи на државата ќе бидат насочени кон побогатите лица кои сакаат одмор со минимални ризици, изјавил министерот за туризам Фифат Рачакитпракарн.


На почетокот владата ќе дозволи влез за мал број туристи, како бизнисмени или медицински туристи, а подоцна ќе почне да поканува претходни посетители во некои од тајландските луксузни одморалишта. Од туристите можеби ќе се бара тестирање за Ковид-19 пред патувањето и по пристигнувањето, а тие ќе треба и да одберат остров и да останат на него одреден период.

Овие туристи ќе може слободно да се движат на островот што ќе го одберат и ќе може да го напуштат по 14 дена. Сепак, првите туристи што би пристигнале на Тајланд ќе чекаат најмалку до август, според министерот.


Првите патувачки балони веројатно ќе бидат договорени со Јапонија и Австралија, а се размислува и за пуштање туристи од некои кинески градови и провинции. 

Тајланд планира да има 10 милиони туристи оваа година, што е една четвртина од бројот забележан минатата година.

Автор: Натнича Чувируч
Извор: bloomberg.com