Универзитетот во Костарика го лансира првиот механички респиратор дизајниран и изработен во оваа земја.

Лекарите од Универзитетот во Костарика успеале да го развијат првиот неинвазивен респиратор за пациенти заболени од Ковид-19. Наречен „Флуксус Маск“, уредот е и машина за дишење и маска што го спречува ширењето на коронавирусот. Респираторот бил создаден поради зголемена загриженост дека Ковид-19 брзо се шири на глобално ниво и нема да има доволно механички респиратори ако пандемијата ескалира.

Многу погодени земји (САД, Италија, Франција, Бразил) не успеале да одговорат на зголемената побарувачка за респиратори. Традиционален респиратор може да чини и до 50.000 долари, особено ако се купува на црниот пазар, додека просечната цена е 10.000 долари. Респираторот на Костарика ќе чини 2.000 долари.


„Флуксус маск“ е уникатен респиратор затоа што не зависи од електрична енергија за да функционира. Многу рурални здравствени клиники, како и многу амбулантни возила, немаат сигурен извор на електрична енергија. Друга предност е што пациентите не треба да се интубираат, така што маската е неинвазивна. Освен тоа, респираторот ќе има ниска цена за производство.

Тимот избрал да работи само со материјали што можат да се набават локално и локално достапни филтри, вентили и цевки. Филтрите се перат и можат повторно да се употребат. Биле направени сите напори за да се дизајнира уред што ќе биде 100 отсто произведен и сервисиран во Костарика.

Основната цел на тимот била да спречи пациентите да стигнат до толку критично ниво на болеста за да биде потребна интубација.

- Замислете дека личноста која можеби има Ковид-19 пристигнува во клиниката. Веднаш може да му се стави „Флуксус маск“ додека лекарите му приоѓаат без страв дека може да ги зарази со вирусот - вели Мигел Инбах Бартол.

Следниот чекор е финансирање за стартап.

Извор: News.co.cr