Иако има намена да ги поврзи најпросперитетните региони во Кина заедно, најдолгиот мост во светот е мета и на критики.

Најдолгиот мост во светот се отвори денес и тој ги поврзува Хонг Конг, Макао и Кина девет години по изградбата, но критичарите велат дека не многу луѓе ќе можат да го користат. Отворањето доаѓа во време кога Пекинг се обидува да го заостри своето владеење на неговите полуавтономни територии.

Преминот долг 55 километри, во кој е вклучен извонреден патен мост и подводен тунел, е поврзница меѓу азиската финансиска метропола Хонг Конг и Макао со кинеската провинција, Гуангдонг.


Супермостот ќе биде отворен за сообраќај утре, еден ден по церемонијата. Градбата започнала во 2009 година и со него се поврзани голем број контроверзии како одложување, пречекорување на буџетот, обвиненија за корупција и смрт на градежни работници.

Церемонијата за отворање на мостот беше најавена минатата недела од политичарите, но транспортните компании се пожалија дека се изоставени.

Поддржувачите на проектот го промовираат како инженерско чудо што ќе го зајакне бизнисот и ќе го намали времето за патување, додека други го сметаат за политички чекор и скап „бел слон“.


Жителите на Хонг Конг го критикуваат мостот велејќи дека е губење на пари на народот, а луѓето кои се залагаат за заштита на загрозениот кинески бел делфин, велат дека мостот предизвикал опаѓање на бројот на овие животни.

-Толку голема инвестиција користејќи ги парите на народот, а не е отворена за нас - коментираат луѓето.