Австрија најави дека од 5 март ќе ги укине сите рестриктивни мерки, но правилата за влез во земјата засега остануваат исти. Словенија ги укинува сите мерки за влез во земјата, а за влез во Косово потребен е сертификат за целосна вакцинација

Македонските државјани ќе може слободно да патуваат во Србија и во Словенија доколку се усвои предлогот на Комисијата за заразни болести да се укинат вакциналните сертификати и потврдите за прележан ковид, како и негативен ПЦР-тест за излез од земјата.

Србија и досега не бараше македонските државјани при влез да покажат ковид-сертификат за примени вакцини или за прележана болест, ниту пак негативен ПЦР-тест. Ова не важи за македонските граѓани кои во Србија влегуваат од други земји.
За влез во Словенија, тие веќе не се потребни. Според информациите објавени на веб-страницата на Министерството за надворешни работи на Словенија, од 19 февруари рестрикциите за влез во Словенија поврзани со ковид-19 веќе не важат. Освен што нема да треба на граничен премин да покажуваат ковид-сертификат, потврда за прележаност на болест или негативен-ПЦР тест, за патниците веќе нема да има ниту наредба да останат во карантин при влез во Словенија.

Тест за невакцинираните за влез во Грција

Грција од 21 февруари годинава исто така ги олабави мерките, односно од патниците што влегуваат во земјата нема да се бара дополнителен негативен ковид-тест. Според информациите објавени на веб-страницата на Министерството за надворешни работи на Грција, сите патници што влегуваат во земјата од 21 февруари до 7 март, кои имаат европски дигитален ковид-сертификат, не се обврзани да покажат дополнителен негативен ковид-тест. Ова важи за сите земји членки на ЕУ, како и за оние земји, меѓу кои и Македонија, што се придружиле на дигиталниот ковид-систем на ЕУ.
Сепак, за влез во Грција ќе треба да се покаже сертификат за целосно завршена вакцинација најмалку 14 дена по примање на втората доза, кој важи 9 месеци по завршувањето со вакцинацијата. Временско ограничување нема за патниците што примиле трета доза. Во Грција може да се влезе и со потврда за прележан ковид-19 најмалку 14 дена по првиот позитивен тест, а најмногу до 180 дена од прележувањето. Непрележаните и невакцинираните ќе може да влезат во Грција со негативен ПЦР-тест не постар од 72 часа или негативен брз антигенски тест не постар од 24 часа.

Европската Унија донесе одлука со која од вчера дигитален сертификат за прележан ковид-19 ќе може да издаваат земјите членки и според резултатите од брзите антигенски тестови, а не само со ПЦР-тест како што беше досега. За да бидат веродостојни потврдите, брзите антигенски тестови треба да бидат на листата на ЕУ, како и да се направени од здравствени работници.


За влез во Турција за сите патници што доаѓаат по авионски, поморски или копнен пат, потребен е негативен ПЦР-тест не постар од 72 часа. Ова важи за сите патници постари од шест години. Исклучок од ова се авионскиот екипаж, професионалните возачи и патници во авионскиот транзит. Според информациите објавени во јуни лани на веб-страницата на Амбасадата на Турција во Македонија, на македонските државјани при влез во Турција нема да им се бара да приложат негативен ПЦР-тест доколку имаат потврда дека се вакцинирале најмалку 14 дена пред влезот во Турција, или ја прележале болеста во последните шест месеци. За нив не е предвиден карантин. Тие што немаат ваква потврда, при влез во Турција треба да покажат негативен ПЦР-тест не постар од 72 часа или негативен брз антигенски тест не постар од 48 часа. На веб-страницата стои и информацијата дека патниците што ќе влезат во земјата може при влез да бидат тестирани од здравствените работници по случаен избор.

Правилата за патување во Босна и Херцеговина и натаму остануваат, односно за влез во земјата потребен е негативен ПЦР-тест не постар од 72 часа или брз антигенски тест не постар од 48 часа. Во оваа земја може да се патува и со потврда за вакцинација, а од последната доза да се поминати 14 дена, или потврда за прележан ковид-19, но од првиот позитивен тест да не се поминати помалку од 14 дена, а не повеќе од 180 дена. Ова не важи за деца помали од седум години.

За влез во Косово патниците треба да покажат сертификат за целосна вакцинација со две дози или една доза од вакцините кои се даваат во една доза, при што да не се поминати повеќе од 12 месеци од приемот на втората доза. Во оваа земја може да се влезе и со сертификат за примена една доза од вакцината со негативен ПЦР-тест не постар од 48 часа, со потврда дека лицето оздравело од ковид-19, при што да не се поминати помалку од 21 ден и не повеќе од 90 дена од првиот позитивен ПЦР-тест. Во Косово може да се влезе и со потврда за примена трета бустер-доза, а непрележаните и невакцинираните со негативен ПЦР-тест не постар од 48 часа.

Во Австрија останува правилото за влез во државата лицата да бидат вакцинирани, да прележале ковид или да имаат негативен ПЦР-тест бидејќи земјата најави дека од 5 март ќе ги укине сите рестриктивни заштитни мерки, освен обврската да се носат маски во јавниот превоз, како и во банките, поштите, супермаркетите и аптеките. Правилото вакцинирани, прележани или со негативен тест ќе важи на целата територија на земјата, освен во Виена каде што останува правилото или да се вакцинирани или да ја прележале болеста. Во Австрија може да влезат лица што се целосно вакцинирани или ја прележале болеста, а потврдите да не се постари од шест месеци. Во земјата може да влезат и невакцинирани со негативен ПЦР-тест не постар од 72 часа, како и лицата што имаат потврда за примена трета бустер-доза. За малолетни лица до 12 години кои патуваат под надзор на едно возрасно лице, не важи обврската за поседување доказ.
Лицата што прележале ковид ќе може да влезат во Германија со потврда за прележаност не постара од три месеци, односно да не поминале помалку од 28 дена, а не повеќе од 90 дена од првиот позитивен резултат за инфекција со ковид.
Според информациите на италијанското Министерство за надворешни работи, за влез во Италија од први овој месец, за сите лица што доаѓаат од ЕУ, ќе биде потребен само ковид-сертификат без потреба за дополнително тестирање.