Фиренца е прогласена за најдобар европски град според изборот на читателите на „Травел + лежр“ во рамките на годинашните награди „Најдоброто во светот за 2025“.

Главниот град на Тоскана го зазеде 11. место на светската листа, што го прави највисокорангирана европска дестинација оваа година. Првото место му припадна на Сан Мигел де Аљенде во Мексико. Оахака и Токио ги зазедоа второто и третото место.

Иако првите десет места главно ги зазедоа градови од Латинска Америка и Азија, неколку европски градови успеаја да се искачат на листата поради нивната култура, гастрономија и историски шарм.

Италија се издвојува со три града на листата

Ранг-листата е составена врз основа на речиси 180.000 одговори од читатели. Градовите биле оценувани според шест категории: знаменитости, култура, храна, љубезност, шопинг и вредност за парите.

Италија е единствената европска земја со три града меѓу првите 25: Фиренца (11. место), Рим (18. место) и Сиена (23. место). Сите се пофалени за својата безвремена убавина, одличната храна и богата култура. 


Фиренца и понатаму ги маѓепсува патниците со светски познатата уметност и сончеви плоштади. Градот нуди вистински празник за очите - сето тоа на растојание што може да се помине пеш. Неговите рустични ресторани, често семејни и со долга традиција, ја засилуваат атмосферата на вечност.

Рим, пак, нуди нешто што малку градови можат да го надминат: неверојатна историја. Вечниот град доби високи оцени поради спојот на антички урнатини и спонтани моменти на улица.

Тука е и добро сочуваниот тоскански град Сиена. Овој град од 12 век, прогласен за светско наследство на УНЕСКО од 1995 година, се издигнува од ридови, со своите средновековни ѕидини и готски кули кои веднаш привлекуваат внимание.

И Шпанија и Турција со високи позиции

Шпанија се појавува на листата со два андалузиски града веднаш зад Фиренца: Севиља на 12. и Гранада на 13. место. Двата града се познати по своето историско наследство и старите делови полни со атмосфера. Истанбул, кој го поврзува европскиот и азискиот континент, се најде на 14. место.

Севиља е чиста јужна шпанска магија со фламенко што одекнува низ тесните улички, жива ноќна сцена и величествени историски градби.

Гранада, на подножјето на планините Сиера Невада, нуди посмирена слика, но не и помалку волшебна. Алхамбра, тврдината на ридот со фонтани, градини и архитектура, останува едно од највпечатливите места во Европа.

Во меѓувреме, Истанбул ги воодушевува посетителите со вкусната храна, фасцинантната историја и местоположбата на пресекот на два континента, што го прави еден од најживописните градови во светот.

На листата отсуствува Франција

Една земја, сепак, целосно отсуствуваше од листата.

Иако Франција е најпосетената земја во светот, со повеќе од 100 милиони туристи годишно, ниту еден нејзин град не се најде во топ-25 оваа година.

Причината е тоа што патниците и туристите сакаат помали, побавни градови со помалку проблеми со масовен туризам. Последниот европски град што влезе на листата, португалскиот Порто, кој се најде на 24. место, го потврдува токму овој тренд, иако туризмот таму е веќе во пораст.

Извор: Euronews.com
Фото: Freepik